ភ្នំពេញ៖ ជនសង្ស័យម្នាក់ធ្វើសកម្មភាពលួចកាច់សោរ.កម៉ូតូបានសម្រេចតែរត់មិនរួចដោយសារម្ចាស់ឃើញទាន់បង្កការភ្ញាក់ផ្អើលព័ទ្ធចាប់បានវាយទ្រោមខ្លួនទើបប្រគល់ឲ្យសមត្ថកិច្ច។

ករណីនេះកើតឡើងកាលពីវេលាម៉ោង១០និង៣០នាទីព្រឹកថ្ងៃទី២២ ខែកក្កដា ឆ្នាំ២០១៦ នៅចំណុចខ្នងប្រឡាយភូមិទួលសំពៅ សង្កាត់គោករការ ខណ្ឌព្រែកព្នៅ ។

ជនសង្ស័យដែលធ្វើសកម្មភាពកាច់សោរ.កម៉ូតូមានឈ្មោះ ពេជ្រ ដារ័ត្ន អាយុ១៨ឆ្នាំ មុខរបរមិនពិតប្រាកដ ស្នាក់នៅភូមិសែនសុខ១ សង្កាត់ឃ្មួញ ខណ្ឌសែនសុខ មានស្រុកកំណើតនៅភូមិថ្មី ឃុំសូភី ស្រុកបាទី ខេត្តតាកែវ។

ដើមបណ្តឹងជាម្ចាស់ម៉ូតូមានឈ្មោះ ណែម ចាន់សឹុម  ភេទប្រុស អាយុ៣៨ឆ្នាំ មុខរបរដាំឈូក ស្នាក់នៅភូមិព្រៃធំសង្កាត់គោករការ ខណ្ឌព្រែកព្នៅ និងមានស្រុកកំណើតភូមិកំពង់ត្រឡាច ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង។

បើតាមសំដីម្ចាស់ម៉ូតូបានប្រាប់ឲ្យដឹងថា មុនកើតហេតុគាត់បានចតម៉ូតូ១គ្រឿងទុកចោល ម៉ាកសេ១២៥ ពណ៌ខ្មៅសេរីឆ្នាំ២០១៣ ពាក់ស្លាកលេខ ភ្នំពេញ 1BU-6406 ដោយចតចោលនៅលើខ្នងទំនប់ ហើយរូបគាត់ជាប់រវល់ចុះដាំឈូកក្នុងបឹងស្រាប់តែលេចមុខជនសង្ស័យខាងលើមកធ្វើសកម្មភាពលួចកាច់សោរ.កម៉ូតូបម្រុងជិះចេញ ត្រូវគាត់ឃើញទាន់ស្រែឆោរឡោផ្អើលប្រជាពលរដ្ឋដែលឃើញហេតុការជួយដេញព័ទ្ធចាប់បានភ្លាមៗស្វាគមន៍មួយដៃមួយជើងឡើងទ្រោមខ្លួនទើបប្រគល់ឲ្យសមត្ថកិច្ចប៉ុស្តិ៍នគរបាលរដ្ឋបាលគោករការ។

បន្ទាប់ពីចាប់ឃាត់ខ្លួនជនសង្ស័យឆែកឆេរក្នុងកាបូបស្ពាយរកឃើញសម្ភារសម្រាប់ធ្វើសកម្មភាពកាច់សោរ.កម៉ូតូមួយឈុតនិងម៉ូតូរបស់ជនរងគ្រោះ១គ្រឿងបានមកវិញ។

បច្ចុប្បន្នជនសង្ស័យត្រូវបានសាកសួរនៅប៉ុស្តិ៍គោករការ បន្តញ្ជូនខ្លួនទៅផ្នែកជំនាញអធិការដ្ឋាននគរបាលខណ្ឌព្រែកព្នៅ ចាត់ការតាមនីតិវិធី៕

ដោយ៖ តុង សីហា