ខេត្តបន្ទាយមានជ័យ+បាត់ដំបង៖ រយៈពេល១ថ្ងៃគ្រោះថ្នាក់ចរាចរណ៍២ករណីផ្សេងគ្នាកើតឡើងនៅខេត្តបន្ទាយមានជ័យ និងខេត្តបាត់ដំបង បណ្តាលឱ្យមនុស្សចាស់ និងកុមារសរុប៣នាក់ស្លាប់ហើយរងបួសធ្ងន់ស្រាល៤នាក់។

នៅខេត្តបន្ទាយមានជ័យគ្រោះថ្នាក់ចរាចរណ៍ កុមារម្នាក់ត្រូវបានរថយន្តម៉ាកលុចស៊ីសRX៣០០កិនស្លាប់បន្ទាប់ពីត្រូវបានក្រុមគ្រួសារដឹកបញ្ជូនសង្រ្គោះដល់មន្ទីរពេទ្យកាលពីវេលាម៉ោង៨ព្រឹកថ្ងៃទី២២ ខែកក្កដា ឆ្នាំ២០១៦ នៅចំណុចភូមិមិត្តភាព សង្កាត់-ក្រុងប៉ោយប៉ែត ។

កុមាររងគ្រោះមានឈ្មោះ ហាក់ ឥស្សរសយ ភេទប្រុស អាយុ២ឆ្នាំ រស់នៅភូមិ-សង្កាត់ខាងលើ ។ មុនពេលកើតហេតុគេឃើញឪពុកក្មេងរងគ្រោះនិងអ្នកបើករថយន្តបង្កស្គាល់គ្នាកំពុងឈរនិយាយលេងនៅខាងមុខផ្ទះក្មេងរងគ្រោះ។ លុះបន្ទាប់មក រវាងអ្នកបើករថយន្តបង្កនិងឪពុកក្មេងរងគ្រោះបានជម្រាប់លាគ្នា ។ អ្នកបើករថយន្តបង្កក៏បានថយរថយន្តចេញមកដោយមិនឃើញក្មេងរងគ្រោះនៅខាងក្រោយរថយន្ត ក៏ថយរថយន្តកិនក្មេងរងគ្រោះបណ្តាលឱ្យរងបួសធ្ងន់។ ភ្លាមនោះក៏បង្កឱ្យមានការភ្ញាក់ផ្អើល អ្នកបើករថយន្តបង្កនិងឪពុកក្មេងរងគ្រោះក៏បានដឹកតាមរថយន្តបង្ក បញ្ជូនដល់មន្ទីរពេទ្យ។ លុះដល់មន្ទីរពេទ្យក្មេងរងគ្រោះដាច់ខ្យល់ស្លាប់ ចំណែកអ្នកបើករថយន្តបង្កបានលួចបើករថយន្តរត់គេចខ្លួនបាត់។ បច្ចុប្បន្នសមត្ថកិច្ចកំពុងតែស្រាវជ្រាវស្វែងរកចាប់ខ្លួនអ្នកបើករថយន្តបង្កដើម្បីយកមកអនុវត្តតាមផ្លូវច្បាប់។

ចំណែកនៅខេត្តបាត់ដំបងឯណោះវិញ មានករណីកើតឡើងរវាងរថយន្តបើកបុកអ្នកជិះម៉ូតូបណ្តាលឱ្យអ្នកបើកម៉ូតូនិងរថយន្តស្លាប់និងរបួស៦នាក់។ សេចក្តីរាយការណ៍ឱ្យដឹងថា យ៉ាងហោចណាស់អ្នកបើកម៉ូតូ១គ្រឿងម៉ាកយ៉ាម៉ាហាហ្វីណូ ពណ៌ស គ្មានស្លាកលេខធ្វើដំណើរជិះឌុបគ្នាកូននិងក្មួយតូចៗសរុប៥នាក់ក្នុងនោះមានកុមារ៤នាក់ត្រូវបានរថយន្ត១គ្រឿងម៉ាកកាមរីបាឡែន ពណ៌ស្ករ ពាក់ស្លាកលេខបាត់ដំបង2B-0199 បុកចំពីចំហៀងពេញទំហឹងបណ្តាលម៉ូតូខ្ទាតធ្លាក់ពីលើផ្លូវ ចំណែករថយន្តរេចង្កូតក្រឡាប់ផ្ងាជើង ។

ក្នុងហេតុការណ៍នោះគេឃើញអ្នកជិះម៉ូតូស្លាប់២នាក់នៅកន្លែងកើតហេតុ ចំណែក៣នាក់ទៀតទទួលរងបួសធ្ងន់ស្រាល ត្រូវបានគេដឹកតាមរថយន្តពេទ្យយកទៅសង្រ្គោះជីវិត។ រីឯអ្នកបើករថយន្តរងរបួសស្រាលនោះដែរ ក៏ប៉ុន្តែបានព្យាយាមលូនចេញពីរថយន្ត រត់គេចខ្លួបាត់។ ហេតុកាណ៍នោះកើតឡើងកាលពីវេលាម៉ោង១១ និង១០នាទីព្រឹកថ្ងៃទី២២ ខែកក្កដា ឆ្នាំ២០១៦ នៅចំណុចភូមិតាសែន ឃុំតាសែន ស្រុកកំរៀង។

សេចក្តីរាយការណ៍ឱ្យដឹងទៀតថា មុនពេលកើតហេតុអ្នកបើកម៉ូតូបើកចេញពីវត្តដើម្បីឡើងលើថ្នល់ជាតិ បម្រុងបត់ទៅផ្ទះ។ លុះរំពេចនោះស្រាប់តែគេឃើញរថយន្តបាឡែន បើកបរល្បឿនលឿនតាមថ្នល់ជាតិបើកបុកម៉ូតូបណ្តាលឱ្យគ្រោះថ្នាក់យ៉ាងរន្ធត់តែម្តង។

ជនរងគ្រោះស្លាប់ទី១,មានឈ្មោះ គង់ សុខវ៉ាន់ ភេទស្រី អាយុ៣៥ឆ្នាំ ជាអ្នកបើកម៉ូតូ ទី២,ម៉ាន់ ដាណេ ភេទស្រី អាយុ២ឆ្នាំ ត្រូវជាកូន ។ចំណែកអ្នករងរបួស ទី៣,ឈ្មោះ ម៉ាន់ ពេជ្រ ភេទប្រុស អាយុ៦ឆ្នាំ ត្រូវជាកូន ស្រ្តីអ្នកបើកម៉ូតូ ទី៤,មាន ស្រីកា ភេទស្រី អាយុ៣ឆ្នាំ និងទី៥,អ៊ឹម ដាវីន ភេទប្រុស អាយុ៧ឆ្នាំ ត្រូវជាក្មួយ អ្នករងគ្រោះរស់នៅភូមិកើតហេតុខាងលើ។ ចំណែកអ្នកបើករថយន្តបង្កត្រូវបានគេស្គាល់ឈ្មោះ យ៉ា សំបូរ ភេទប្រុស អាយុ៣៧ឆ្នាំ រស់នៅភូមិគីឡូ១៣ ឃុំសន្តិភាព ស្រុកសំពៅលូន។

បច្ចុប្បន្នសមត្ថកិច្ចកំពុងស្រាវជ្រាវស្វែងរកចាប់ខ្លួនអ្នកបើករថយន្តបង្កដើម្បីយកមកអនុវត្តតាមផ្លូវច្បាប់ ហើយរថយន្តនិងម៉ូតូទាំង២គ្រឿងត្រូវបានសមត្ថកិច្ចស្ទូចយកមករក្សាទុកនៅអធិការដ្ឋាននគរបាលស្រុកកំរៀង៕

ដោយ៖ សំ វិច្ឆិកា