ខេត្តពោធិ៍សាត់ ៖ លោក ស្នងការរងទទួលផែនការងារព្រហ្មទណ្ឌនៃស្នងការដ្ឋាននគរបាលខេត្តពោធិ៍សាត់ បានឲ្យដឹងនារសៀលថ្ងៃសៅរ៍ ១១កើត ខែពិសាខ ឆ្នាំរោង ឆស័ក ព.ស ២៥៦៧ ត្រូវនឹងថ្ងៃទី១៨ ខែឧសភា ឆ្នាំ២០២៤ នេះថា ជំនាញព្រហ្មទណ្ឌកំពុងបន្តនីតិវិធី ដើម្បីបញ្ជូនជនសង្ស័យប្រុសស្រីចំនួន៨នាក់ ទៅសាលាដំបូងខេត្តពោធិ៍សាត់ ពាក់ព័ន្ធករណីលួច ។
លោក ស្នងការរងឲ្យដឹងទៀតថា ជនសង្ស័យទាំងចំនួន៨នាក់ពាក់ព័ន្ធលួចនេះ សមត្ថកិច្ចនគរបាលយើងអនុវត្តបណ្ដឹងរបស់ឈ្មោះ ទិត្យ ម៉ូត ភេទប្រុស អាយុ ៥៤ឆ្នាំ ជនជាតិខ្មែរឥស្លាម មុខរបរ លក់ដូរ មានទីលំនៅ ភូមិអន្លង់មាន ឃុំស្នាមព្រះ ស្រុកបាកាន ខេត្តពោធិ៍សាត់ ថា មានមិនស្គាល់អត្តសញ្ញាណចូលលួចដែក ក្នុងឃ្លាំងដាក់សម្ភារៈរបស់គាត់ ទើបសមត្ថកិច្ចធ្វើការស្រាវជ្រាវរហូតកំណត់មុខសញ្ញា និងឈានដល់ធ្វើការឃាត់ខ្លួនជាបន្តបន្ទាប់ចំនួន៨នាក់ រួមទាំងវត្ថុតាង និងសម្ភារៈផ្សេងៗ ។
លោក បញ្ជាក់បន្ថែមទៀតថា ជនសង្ស័យទី-១ ភន ភា ភេទប្រុស អាយុ ៣២ឆ្នាំ ជនជាតិខ្មែរ រស់នៅ ភូមិពោធិ៍របង ឃុំកំពង់ពោធិ៍ ស្រុកក្រគរ ខេត្តពោធិ៍សាត់ ទី-២ ឈ្មោះ នៀម និត ភេទប្រុស អាយុ ១៨ឆ្នាំ ជនជាតិខ្មែរ រស់នៅ ភូមិមាត់ព្រៃ ឃុំកំពង់ពោធិ៍ ស្រុកក្រគរ ខេត្តពោធិ៍សាត់ ទី-៣ ឈ្មោះ ភួង ដេ ភេទប្រុស អាយុ ១៨ឆ្នាំ ជនជាតិខ្មែរ ភូមិពោធិ៍របង ឃុំកំពង់ពោធិ៍ ស្រុកក្រគរ ខេត្តពោធិ៍សាត់ ទី-៤ ឈ្មោះ ភួង ប្រុសលី ភេទប្រុស អាយុ ១៥ឆ្នាំ ជនជាតិខ្មែរ រស់នៅ ភូមិពោធិ៍របង ឃុំកំពង់ពោធិ៍ ស្រុកក្រគរ ខេត្តពោធិ៍សាត់ ទី-៥ ឈ្មោះ ចន សុធា ភេទប្រុស អាយុ ១៧ឆ្នាំ ជនជាតិខ្មែរ រស់នៅ ភូមិមាត់ព្រៃ ឃុំកំពង់ពោធិ៍ ស្រុកក្រគរ ខេត្តពោធិ៍សាត់ ទី-៦ ឈ្មោះ ឌុល ឌី ភេទប្រុស អាយុ ១៦ឆ្នាំ ជនជាតិខ្មែរ រស់នៅ ភូមិកំពង់ឡ ឃុំកំពង់ពោធិ៍ ស្រុកក្រគរ ខេត្តពោធិ៍សាត់ ទី-៧ ឈ្មោះ មាស ពិសិត ភេទស្រី អាយុ ៣៥ឆ្នាំ ជនជាតិខ្មែរ មុខរបរ ទិញលក់អេតចាយ ភូមិពោធិ៍របង ឃុំកំពង់ពោធិ៍ស្រុកក្រគរ ខេត្តពោធិ៍សាត់ និងទី-៨ ឈ្មោះ ចឺន មករា ភេទប្រុស អាយុ ១៦ឆ្នាំ ជនជាតិខ្មែរ រស់នៅ ភូមិមាត់ព្រៃ ឃុំកំពង់ពោធិ៍ ខេត្តពោធិ៍សាត់ ។
លោក បញ្ជាក់បន្ថែមបន្តទៀតថា ក្នុងនោះសមត្ថកិច្ចដកហូតវត្ថុតាង និងទាំងសម្ភារៈរួមមាន ដែកថ្នាំងអំពៅចំនួន២០ដើម ម៉ូតូ និងម៉ូតូសណ្ដោងរឺម៉កចំនួន០៣គ្រឿង ថែមទាំងទូរស័ព្ទចំនួន០៣គ្រឿងផងដែរ ករណីនេះសមត្ថកិច្ចកសាងសំណុំរឿងបញ្ជូនទៅ សាលាដំបូងខេត្តពោធិ៍សាត់ ៕ ដោយៈ ប៉ឹម ពិន
