ខេត្តកណ្ដាល ៖ ស្ត្រីពីរនាក់ (ម្នាក់រងរបួសធ្ងន់ ម្នាក់ទៀតរងរបួសស្រាល) បន្ទាប់ពីជិះម៉ូតូឌុបគ្នាជ្រុលទៅបុករថយន្តSIENNA កំពុងបត់ឆ្លងផ្លូវ នៅវេលាម៉ោង១ និង៥០នាទីរសៀលថ្ងៃទី២១ ខែឧសភា ឆ្នាំ២០២៤ នៅលេីផ្លូវជាតិលេខ៣ ត្រង់ចំណុចគីឡូម៉ែត្រលេខ៣២ ភូមិតាឡឹក ឃុំត្រពាំងវែង ស្រុកកណ្ដាលស្ទឹង ខេត្តកណ្ដាល ។
ស្ត្រីរងគ្រោះទាំងពីរនាក់ខាងលេីរួមមាន ៖ ទី១ (របួសធ្ងន់)ឈ្មោះ និល សុខនា ភេទស្រី អាយុ៣៥ឆ្នាំ រស់នៅស្រុកព្រៃកប្បាស ខេត្តតាកែវ ។ទី២ (របួសស្រាល) ឈ្មោះ និល សុខណេត ភេទស្រី អាយុ៣២ឆ្នាំ រស់នៅស្រុកព្រៃកប្បាស ខេត្តតាកែវ ។ ដោយជិះម៉ូតូម៉ាក ហុងដាឌ្រីម ស៊េរីឆ្នាំ២០១០ ពណ៌ខ្មៅ ពាក់ផ្លាកលេខ កំពត 1D-1410 ។
តាមសម្ដីស្ត្រីរងគ្រោះដែលរងរបួសស្រាល បាននិយាយប្រាប់ឲ្យដឹងថា មុនកេីតហេតុ រូបគាត់ទាំងពីរ(ស្ត្រីរបួសធ្ងន់)បានជិះម៉ូតូមួយគ្រឿងឌុបគ្នា ចេញពីផ្ទះនៅស្រុកព្រៃកប្បាស ដោយធ្វេីដំណេីរតាមបណ្ដោយផ្លូវជាតិលេខ៣ បំណងទៅកន្លែងធ្វេីការនៅកំពង់ស្ពឺ ។ ខណៈរូបគាត់ទាំងពីរជិះម៉ូតូមកដល់កន្លែងកេីតហេតុ ស្រាប់តែមានរថយន្តម៉ាកToyota SIENNA ពណ៌ស ពាក់ផ្លាកលេខភ្នំពេញ 2AF-3435 បានធ្វេីដំណេីរតាមបណ្ដោយផ្លូវជាតិលេខ៣ ទិសដៅពីជេីងមកត្បូង រួចបានបត់ឆ្វេងបំរុងចូលការ៉ាស់សាំង ដោយរថយន្តឆ្លងជិតផុត ក៏ត្រូវម៉ូតូស្ត្រីរងគ្រោះបុកចំពីចំហៀងក្បាលខាងស្ដាំរថយន្តពេញទំហឹង បណ្ដាលឲ្យស្ត្រីជាអ្នកឌុបរងរបួសធ្ងន់ រីឯស្ត្រីអ្នកអង្គុយពីក្រោយរងរបួសស្រាល ។ ដោយឡែកម៉ូតូបានបាក់ក រងការខូចខាតយ៉ាងដំណំ ឯរថយន្តរងការខូចខាតតិចតួច ។
ក្រោយកេីតហេតុ ប្រជាពលរដ្ឋដែលធ្វេីដំណេីរឆ្លងកាត់ និងអ្នកនៅក្បែរកន្លែងកេីតហេតុបានជួយបាំងកំដៅថ្ងៃ លេបប្រេងក្រឡា និងទាក់ទងរថយន្តសង្គ្រោះបន្ទាន់ ព្រមទាំងសមត្ថកិច្ចមូលដ្ឋានឲ្យចុះដល់កន្លែងកេីតហេតុ ។ បន្ទាប់មករថយន្តសង្គ្រោះបន្ទាន់របស់មន្ទីរពេទ្យបង្អែកកណ្ដាលស្ទឹង ចុះមកដល់នឹងដឹកស្ត្រីរងគ្រោះទាំងពីរទៅមន្ទីរពេទ្យដេីម្បីសង្គ្រោះអាយុជីវិត ។ រីឯម៉ូតូ និងរថយន្តបង្ក ត្រូវបានសមត្ថកិច្ចជំនាញធ្វេីការវាស់វែងយកទៅរក្សាទុកផ្នែកចរាចរណ៍ នៃនគរបាលស្រុកកណ្ដាលស្ទឹង រង់ចាំដោះស្រាយតាមក្រោយ ៕ ដោយ ៖ ភារ៉ា ដង្កោ
