ខេត្ត​កំពង់ស្ពឺ៖ ដើម្បីបង្ការ ទប់ស្កាត់ និងបង្រ្កាបបទល្មើសឱ្យមានប្រសិទ្ធភាព នាយឧត្តមសេនីយ៍ ស ថេត អគ្គស្នងការនគរបាលជាតិ​ បានថ្លែង​ណែនាំដល់ស្នងការដ្ឋាននគរបាលខេត្តកំពង់ស្ពឺ ត្រូវចេះធ្វើការព្យាករណ៍សភាពការណ៍ កសាងផែនការជាក់ស្តែង ពិសេសការចាត់តាំងអនុវត្ត។ ជាមួយគ្នានោះ លោកអគ្គស្នងការនគរបាលជាតិ ក៏បានផ្តល់អនុសាសន៍ដល់ស្នងការនគរបាលខេត្តកំពង់ស្ពឺថ្មី ត្រូវយកគំរូតាមស្នងការនគរបាលខេត្តចាស់ ក្នុងការបញ្ជាដឹកនាំកងកម្លាំង និងការកៀគរសប្បុរសជនដើម្បីអភិវឌ្ឍនៅក្នុងស្នងការដ្ឋាន។

ការថ្លែងបែបនេះ​របស់​នាយឧត្តមសេនីយ៍ ស ថេត អគ្គស្នងការនគរបាលជាតិ នាឱកាស​តំណាងដ៏ខ្ពង់ខ្ពស់ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោក យឹម សុខុម ប្រធានក្រុមប្រឹក្សាខេត្តកំពង់ស្ពឺ លោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ បានអញ្ជើញជាអធិបតីភាព ក្នុងពិធីប្រកាសផ្ទេរភារកិច្ច និងតែងតាំងមុខតំណែងស្នងការ នៃស្នងការដ្ឋាននគរបាលខេត្តកំពង់ស្ពឺ ដែលកម្មវិធីប្រារព្ធធ្វើឡើងនៅព្រឹកថ្ងៃទី២៨ ខែឧសភា ឆ្នាំ២០២៤នេះ នៅរដ្ឋបាលសាលាខេត្តកំពង់ស្ពឺ។  

ថ្លែងក្នុងឱកាសនោះ លោក វ៉ី សំណាង អភិបាលខេត្តកំពង់ស្ពឺ បានសម្ដែងនូវការកោតសរសើរ និងវាយតម្លៃខ្ពស់ចំពោះសមិទ្ធផល ដែលសម្រេចបាននាពេលកន្លងមករបស់ស្នងការដ្ឋាននគរបាលខេត្តកំពង់ស្ពឺ ក្រោមការដឹកនាំរបស់លោកឧត្តមសេនីយ៍ទោ សម សាមួន ដែលបានបំពេញភារកិច្ចជូនជាតិមាតុភូមិ និងប្រជាពលរដ្ឋក្នុងខេត្តកំពង់ស្ពឺ។ ជាមួយគ្នានោះ​ លោក​នាយឧត្តមសេនីយ៍​ ក៏បានអបអរសាទរលោកឧត្តមសេនីយ៍ទោ ឃឹម សុកខៃ ដែលត្រូវបានតែងតាំងជាស្នងការថ្មី នៃស្នងការដ្ឋាននគរបាលខេត្តកំពង់ស្ពឺ។ 

លោក វ៉ី សំណាង ក្នុងនាមគណៈបញ្ជាការឯកភាពខេត្ត បានធ្វើការផ្តាំផ្ញើដល់ស្នងការនគរបាលខេត្តថ្មីត្រូវបន្តចូលរួមថែរក្សា និងការពាសេចក្តីសុខសន្តិភាពជូនប្រជាពលរដ្ឋទូទាំងខេត្តកំពង់ស្ពឺ ជាមួយគ្នានោះត្រូវបន្តខិតខំសហការបង្ក្រាបបទល្មើសគ្រប់ប្រភេទក្នុងមូលដ្ឋានខេត្ត ជាពិសេសបទល្មើសគ្រឿងញៀន ព្រមទាំងសកម្មភាពក្មេងទំនើងដែលត្រូវយកចិត្តទុកដាក់អនុវត្តតួនាទីភារកិច្ចដែលរាជរដ្ឋាភិបាលបានប្រគល់ជូន។ 

លោកអភិបាលខេត្ត ក៏បានផ្តល់អនុសាសន៍ឲ្យស្នងការនគរបាលខេត្តរក្សា និងពង្រឹងសាមគ្គីភាពផ្ទៃក្នុង គោរពវិន័យ បទបញ្ចារបស់រាជរដ្ឋាភិបាល ក្រសួងមហាផ្ទៃ និងអគ្គស្នងការនគរបាលជាតិ ទន្ទឹមនោះត្រូវបង្កើនជំនឿជឿជាក់ដល់ប្រជាពលរដ្ឋ បម្រើសេវាសាធារណៈក៏ដូចជាជួយយកអាសាប្រជាពលរដ្ឋ សំដៅធានាថែរក្សាសន្តិសុខ សុវត្ថិភាព សណ្តាប់ធ្នាប់ និងជាពិសេសការពារដល់អ្នកវិនិយោគនៅក្នុងខេត្ត។ 

ជាមួយគ្នានោះ អភិបាលខេត្តកំពង់ស្ពឺ បានអំពាវនាវដល់កងកម្លាំងសមត្ថកិច្ច និងអាជ្ញាធរគ្រប់លំដាប់ថ្នាក់បន្តគាំទ្រដល់រដ្ឋបាលខេត្ត ដើម្បីភាពរីកចំរើន និងភាពសុខដុមរបស់ប្រជាពលរដ្ឋក្នុងខេត្តទាំងមូល។ 

ពីវេទិកាអធិបតី លោកនាយឧត្តមសេនីយ៍ ស ថេត អគ្គស្នងការនគរបាលជាតិ បានគាំទ្ររបាយការណ៍របស់ស្នងការដ្ឋាននគរបាលខេត្តកំពង់ស្ពឺ និងឯកភាពចំពោះការប្តេជ្ញាចិត្តរបស់ស្នងការនគរបាលខេត្តកំពង់ស្ពឺថ្មី លោកឧត្តមសេនីយ៍ទោ ឃឹម សុកខៃ ដែលចូលកាន់តំណែងក្នុងថ្ងៃនេះ។ លោកនាយឧត្តមសេនីយ៍ ក៏បានឯកភាពនូវប្រសាសន៍ផ្តាំផ្ញើរបស់ លោក វ៉ី សំណាង អភិបាលខេត្តកំពង់ស្ពឺ ឱ្យស្នងការនគរបាលថ្មីដើម្បីយកទៅអនុវត្តភារកិច្ចឲ្យមានប្រសិទ្ធភាព និងប្រសិទ្ធផល សំដៅរួមគ្នារក្សាសន្តិសុខ សណ្តាប់ធ្នាប់ សុវត្ថិភាព ពិសេសអភិវឌ្ឍខេត្តកំពង់ស្ពឺ ឲ្យមានភាពរីកចំរើន។ 

លោកនាយឧត្តមសេនីយ៍ ស ថេត បានណែនាំឱ្យស្នងការនគរបាលខេត្តកំពង់ស្ពឺថ្មី ត្រូវធ្វើជាសេនាធិការគ្រប់ជ្រុងជ្រោយដល់គណៈបញ្ជាការឯកភាពខេត្ត ដើម្បីរំលេចចេញនូវស្នាដៃរបស់កងកម្លាំងនគរបាល។ លោក ក៏បានគូសបញ្ជាក់ថា នគរបាលជាតិបានដើរតួនាទីយ៉ាងសំខាន់ក្នុងកិច្ចការពារសន្តិសុខ សណ្តាប់ធ្នាប់ សុវត្ថិភាពសង្គម ទន្ទឹមនោះក៏ត្រូវសហការជាមួយកងកម្លាំងសមត្កិច្ច មន្ទីរ អង្គភាពពាក់ព័ន្ធ ពិសេសស្ថាប័នតុលាការទើបការងារអាចសម្រេចបានរលូនទៅមុខសំដៅរក្សាសន្តិសុខ សណ្តាប់ធ្នាប់ សុវត្ថិភាពល្អនៅក្នុងទូទាំងខេត្ត ដើម្បីធានាដល់ការអភិវឌ្ឍ។

ឆ្លៀតក្នុងឱកាសនោះ លោកនាយឧត្តមសេនីយ៍ អគ្គស្នងការនគរបាលជាតិ បានរំលេច ក៏ដូចជារំលឹកនូវស្នាដៃល្អៗដែលកងកម្លាំងនគរបាលជាតិទូទាំងប្រទេស បានបំពេញកន្លងមកដែលក្នុងនោះរួមមាន៖ កិច្ចការពារកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ, កិច្ចការពារព្រឹត្តិការណ៍នៃការប្រកួតកីឡាស៊ីហ្គេម និងប៉ារ៉ាហ្គេម, កិច្ចការពារការបោះឆ្នោត និងសង្ក្រាន្តឆ្នាំថ្មីដែលទទួលបានជោគជ័យយ៉ាងត្រចះត្រចង់ ក្នុងនោះកងកម្លាំងនគរបាលជាតិបានសម្របសម្រួលរៀបចំកិច្ចការពារឲ្យកម្មវិធីទាំងនោះបានសម្រេចទៅដោយភាពសប្បាយរីករាយក្រោមម្លប់សន្តិភាព។

លោកនាយឧត្តមសេនីយ៍ ស ថេត លើកឡើងថា ករណីគ្រោះថ្នាក់ចរាចរណ៍មានការកើនឡើងកន្លងមកក្នុងខេត្តកំពង់ស្ពឺ ដោយសារជាខេត្តសេដ្ឋកិច្ចមានតំបន់រោងចក្រច្រើន ដូច្នេះត្រូវហៅអ្នកបើកបររថយន្តដឹកកម្មករមកផ្សព្វផ្សាយណែនាំអប់រំអំពីច្បាប់ចរាចរណ៍ ព្រមទាំងពិនិត្យបច្ចេកទេសយាន្តយន្តផងដែរ។ 

លោកនាយឧត្តមសេនីយ៍ ក៏បានណែនាំដល់ស្នងការនគរបាលខេត្តកំពង់ស្ពឺថ្មី ដើម្បីជាបទពិសោធន៍ក្នុងការបំពេញភារកិច្ចរួមមាន៖

*១- ដឹកនាំសហការជាមួយស្នងការរងទទួលផែន និងកម្លាំងជំនាញពាក់ព័ន្ធ ពិសេសយកចិត្តទុកដាក់អំពីសុខទុក្ខរបស់មន្រ្តីក្រោមឱវាទ។

*២- ការប្រយុទ្ធប្រឆាំងបទល្មើសគ្រឿងញៀន, បញ្ហាក្មេងទំនើង, បញ្ហាល្បែងស៊ីសង ពិសេសឆ្នោតផ្សងសំណាង ស្នងការនគរបាលខេត្តថ្មី ត្រូវយកចិត្តទុកដាក់ពាក់ព័ន្ធនិងករណីទាំង៣នេះ។ 

*៣- ពង្រឹងវត្តមានមន្ត្រីក្រោមឱវាទជាប្រចាំដើម្បីប្រសិទ្ធភាពការងារ ទន្ទឹមនោះរៀបចំឲ្យមានលិខិតសរសើរ, ប័ណ្ណសរសើរដល់បុគ្គល រឺជាក្រុមដែលមានស្នាដៃក្នុងការបំពេញភារកិច្ចល្អ ដោយឡែកចំពោះមន្រ្តីដែលប្រព្រឹត្តខុសត្រូវអនុវត្តតាមវិន័យរបស់កងកម្លាំង។

*៤- ហាមដាច់ខាតការផ្ទេរកម្លាំងពីប៉ុស្តិ៍នគរបាលរដ្ឋបាល, នគរបាលវរៈការពារព្រំដែន, អន្តរាគមន៍មកបម្រើការនៅស្នងការដ្ឋាន រឺកន្លែងផ្សេងទៀត។ ពាក់ព័ន្ធការស្នើសុំតែងតាំងមន្ត្រី ត្រូវមានកំណត់ហេតុប្រជុំវាយតំលៃពីក្រុមប្រឹក្សាវិន័យច្បាស់លាស់ ស្នងការរងទទួលផែនធនធានមនុស្ស ត្រូវត្រួតពិនិត្យលើបញ្ហានេះ។ 

លោកនាយឧត្តមសេនីយ៍ ស ថេត ជំរុញឱ្យអាជ្ញាធរក្នុងមូលដ្ឋានធ្វើការដោះស្រាយជម្លោះក្រៅប្រព័ន្ធតុលាការចំពោះបញ្ហាវិវាទនៅក្នុងគ្រួសារដែលមានលក្ខណៈតូចតាច ដែលការធ្វើបែបនេះអាចធ្វើឲ្យភាគីជម្លោះមានភាពចំណេញទាំងពេលវេលា និងថវិកាទាំងសងខាង។ 

លោកនាយឧត្តមសេនីយ៍ អគ្គស្នងការនគរបាលជាតិ បានណែនាំដល់មន្ត្រីនគរបាលប៉ុស្តិ៍រដ្ឋបាល និងជំនាញពាក់ព័ន្ធត្រូវបើកទ្វារចាំទទួលពាក្យបណ្តឹងទាំងឡាយពីប្រជាពលរដ្ឋ២៤ម៉ោងលើ២៤ម៉ោង និងត្រូវធ្វើការឆ្លើយតបទៅកាន់ប្រជាពលរដ្ឋវិញពីសំណុំរឿងដែលត្រូវបានដោះស្រាយបានកំរិតណា សំដៅធ្វើយ៉ាងណាឲ្យប្រជាពលរដ្ឋមានភាពកក់ក្តៅ និងជឿជាក់មកលើកងកម្លាំនគរបាល ទន្ទឹមនោះការអនុវត្តតួនាទីភារកិច្ច ត្រូវប្រកាន់ខ្ជាប់នូវភាពម៉ឺងម៉ាត់ ប៉ុន្តែទន់ភ្លន់។

មុននឹងបញ្ចប់ ដើម្បីជាការលើកទឹកចិត្ត លោកនាយឧត្តមសេនីយ៍ ស ថេត អគ្គស្នងការនគរបាលជាតិ បានឧបត្ថម្ភថវិកាចំនួន ១០លានរៀល ម៉ូតូ៣គ្រឿង និងឧបករណ៍សម្ភារៈសម្រាប់បម្រើឲ្យកិច្ចប្រតិបត្តិការដល់ស្នងការដ្ឋាននគរបាលខេត្តកំពង់ស្ពឺ, ឧបត្ថម្ភថវិកាចំនួន ៣លានរៀល ដល់បញ្ជាការដ្ឋានកងរាជអាវុធហត្ថខេត្ត, ឧបត្ថម្ភថវិកាចំនួន ៣លានរៀល ដល់តំបន់ប្រតិបត្តិការសឹករងខេត្ត និងឧបត្ថម្ភថវិកាចំនួន ៣លានរៀល ដល់ពន្ធនាគារខេត្តផងដែរ៕ដោយ​៖តារា​