ខេត្តព្រះសីហនុ ៖ បើហាង«888»ឆ្នេរអូរឈើទាលលក់ស្រាបៀរហនុមាន១កេស72$ ពិតជាថ្លៃណាស់ ! គប្បីអាជ្ញាធរក្រុងព្រះសីហនុ ខេត្តព្រះសីហនុ ស្រាវជ្រាវរកឱ្យឃើញការណ៍ពិត ប្រយោជន៍រក្សាភ្ញៀវទេសចរជាតិ អន្តរជាតិ និងកិត្តិយសខេត្តតំបន់ទេសចរណ៍ឆ្នេរខ្សាច់ និងកោះដ៏ច្រើន ស្អាតបំផុតនៅកម្ពុជា ។

សូមបញ្ជាក់ថា ៖ អ្នកលេង Facebook ដែលមានគណនីឈ្មោះថា «Sopheak Sum» បានបង្ហោះថា ៖ លាហើយ ហាង 888ឆ្នេរអូរឈើទាល ស្រាបៀរហនុមាន ១កេស 72$ ថ្លៃម្ល៉េះ នេះខ្ញុំអ្នកនៅកំពង់សោមផង ថ្លៃដើម20$ យកចំណេញពាក់កណ្ដាលមិនថាទេតែនេះ ថ្លៃជាង KTV ទៀត ពេលសួរទៅចុះត្រឺម 50$ មិត្តភក្តិមកលេងពីភ្នំពេញថា ថ្ងៃក្រោយមកទិញអាហារខ្លួនឯងអង្គុយក្រោមដើមឈើវិញល្អជាង។

ពាក់ព័ន្ធករណីនេះក៏មាន Facebook ឈ្មោះថា «ប្រជាជនខេត្តព្រះសីហនុ» ដែលគេសង្ស័យជាផេករបស់មន្ត្រីរដ្ឋបាលក្រុងព្រះសីហនុ បានបង្ហោះថា ៖ ម្ចាស់ហាង 888 ជួយបកស្រាយឱ្យផង អ្នកកំពុងស្វាគមន៍ភ្ញៀវ ឬដេញភ្ញៀវឱ្យឈប់មក ? 

ម្ចាស់ហាងនៅឆ្នេរអូរឈើទាលពិតជាជួលក្នុងតម្លៃខ្ពស់មែន ប៉ុន្ដែមិនដល់ថ្នាក់ត្រូវលក់ថ្លៃខ្លាំងបែបនេះទេ រួមទាំងម្ហូបផ្សេងៗទៀតផងដែរ ។ ជាសិទ្ធិសេរីភាពក្នុងការដាក់តម្លៃ ប៉ុន្ដែមិនអាចហួសហេតុពេកទេ ។

បើពាក់ព័ន្ធនឹងជំនាញទេសចរណ៍ សូមជួយពិនិត្យផងចុះ ។ 

សូមជម្រាបថា ៖ ការរក្សាតម្លៃលក់ដូរឱ្យបានសមរម្យជាជម្រើសល្អបំផុតសម្រាប់ការទាក់ទាញអ្នកទេសចរមកកម្សាន្ត និងផ្តល់ឱកាសឱ្យអ្នកលក់ដូរទទួលបានកម្រៃថែមទៀតផង ៕ ដោយ ៖ សិលា