ភ្នំពេញ៖ ជនសង្ស័យ៣នាក់ត្រូវបានកម្លាំងនគរបាលប៉ុស្តិ៍ក្បាលកោះចាប់ខ្លួនពាក់ព័ន្ធបទល្មើស២ផ្សេងគ្នា ប្រព្រឹត្តក្នុងភូមិសាស្ត្រតែមួយ ។

ករណីទី១-យុវជនម្នាក់ដែលមានវ័យជាអនីតិជនត្រូវបានចាប់បន្ទាប់ពីជនសង្ស័យធ្វើសកម្មភាពលួចដោះកងដៃផ្លាក់ទីនពីក្មេងស្រីម្នាក់ដែលកំពុងជិះនៅលើរ៉ឺម៉កស្រាប់ជីដូនឃើញទាន់ស្រែកថាចរ…ចោរ…ភ្លាមនោះអ្នកបើករ៉ឺម៉កម៉ូតូរួមជាមួយប្រជាពលរដ្ឋនាំគ្នាដេញចាប់ប្រគល់ឲ្យសមត្ថកិច្ចដោយឡែកបក្ខពួកម្នាក់ទៀតរត់គេខខ្លួនបាត់ ។

ករណីចាប់ខ្លួនជនសង្ស័យលួចដោះកងដៃក្មេងស្រីនៅលើរ៉ឺម៉កម៉ូតូនេះបានធ្វើឡើងនៅវេលាម៉ោង៣ រសៀលថ្ងៃទី២៦ ខែកក្កដា ឆ្នាំ២០១ ៦ នៅចំណុចភូមិព្រែកធំ២ សង្កាត់ក្បាលកោះ ខណ្ឌច្បារអំពៅ ។

ជនសង្ស័យមានឈ្មោះប៊ុន ម៉ៅ ភេទប្រុស អាយុ១៥ឆ្នាំ គ្មានមុខរបរនិងទីលំនៅពិតប្រាកដ ។ ចំណែកក្មេងស្រីរងគ្រោះឈ្មោះមុំ សភាលីដា អាយុ៧ឆ្នាំ មានទីលំនៅភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល ។

ក្រោយចាប់ខ្លួនជនសង្ស័យជាអនីតិជនត្រូវបានបញ្ជូនមកកាន់អធិការដ្ឋាននគរបាលខណ្ឌច្បារអំពៅដើម្បីចាត់ការតាមផ្លូវច្បាប់ ។

ករណីទី២-ជនសង្ស័យ២នាក់រួមជាមួយថ្នាំញៀន៤កញ្ចប់និងម៉ូតូ១គ្រឿងត្រូវបានកម្លាំងនគរបាលប៉ុស្តិ៍ក្បាលកោះចាប់ខ្លួន កាលពីវេលាម៉ោង៥ និង២០នាទីល្ងាចថ្ងៃទី២៦ ខែកក្កដា ឆ្នាំ២០១៦ នៅចំណុចមុខវត្តជ្រោយអំពិល ភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ ។

ជនសង្ស័យមានឈ្មោះឆាយ ចន្ថា ភេទប្រុស អាយុ២២ឆ្នាំ គ្មានមុខរបរពិតប្រាកដ មានទីលំនៅភូមិ-ឃុំភូមិធំ ស្រុកកៀនស្វាយ ខេត្តកណ្តាល និងម្នាក់ទៀតមានឈ្មោះលន សុចិន ភេទប្រុស អាយុ១៦ឆ្នាំ គ្មានមុខរបរពិតប្រាកដ មានទីលំនៅក្នុងភូមិ-ឃុំជាមួយគ្នា ។
ក្នុងការចាប់ខ្លួនជនសង្ស័យទាំង២នាក់នេះសមត្ថកិច្ចដកហូតបានថ្នាំញៀន៤កញ្ចប់ និងម៉ូតូម៉ាក MSX ពណ៌ក្រហម១គ្រឿង ពាក់ស្លាកលេខ ភ្នំពេញ1AF-54 53 ដែលជាមធ្យោបាយរបស់ ជនសង្ស័យជិះធ្វើសកម្មភាពចែកចាយថ្នាំញៀន ។

បច្ចុប្បន្នជនសង្ស័យទាំង២នាក់ត្រូវបានឃាត់ខ្លួននៅអធិការដ្ឋាននគរបាលខណ្ឌច្បារអំពៅដើម្បីចាត់ការតាមផ្លូវច្បាប់ ៕

ដោយ៖ សណ្តោស