ភ្នំពេញ៖ ព្រឹកថ្ងៃទី២៧ ខែកក្កដា ឆ្នាំ២០១៦ លោក នុត ពុធដារ៉ា អភិបាលខណ្ឌដង្កោ និងជាប្រធានកិត្តិយសអនុសាខាកាកបាទក្រហមកម្ពុជាខណ្ឌដង្កោ រួមជាមួយនឹងមន្ត្រីរាជការ ព្រមទាំងព្រះសង្ឃ បាននាំយកអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ទៅចែកជូនប្រជាពលរដ្ឋក្រីក្រចំនួន ៣០គ្រួសារ នៅក្នុងសង្កាត់ស្ពានថ្ម ខណ្ឌដង្កោ។ 

លោក នុត ពុធដារ៉ា បានធ្វើការផ្តាំផ្ញើរការសាកសួរសុខទុក្ខពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិត ដែលជានិច្ចកាលសម្តេចទាំងពីរ តែងគិតគូ និងយកចិត្តទុកដាក់ចំពោះការលំបាករបស់បងប្អូនប្រជាពលរដ្ឋនៅមូលដ្ឋានទូទាំងប្រទេស ជាពិសេសប្រជាពលរដ្ឋក្រីក្រ ចាស់ជរា កុមារកំព្រា ជនពិការ អ្នកផ្ទុកមេរោគអេដស៍ជំងឺអេដស៍ និងជនរងគ្រោះនានា តួយ៉ាងនៅថ្ងៃនេះ អំណោយសម្តេចកិត្តិព្រឹទ្ធបណ្ឌិត បាននាំយកមកចែកជូនប្រជាពលរដ្ឋក្រីក្រ ចំនួន ៣០គ្រួសារបន្ថែមទៀត ក្នុងសង្កាត់ស្ពានថ្ម។

ក្នុងឱកាសនោះ លោកអភិបាលខណ្ឌក៏បានពាំនាំការយកចិត្តទុកដាក់ពីសំណាក់ លោក ប៉ា សុជាតិវង្ស អភិបាលរាជធានីភ្នំពេញ និងជាប្រធានសាខាកាកបាទក្រហមកម្ពុជារាជធានីភ្នំពេញ ជូនដល់បងប្អូនប្រជាពលរដ្ឋទាំងអស់ និងបានផ្តាំផ្ញើរដល់លោកតា លោកយាយ ថែរក្សាសុខភាពឲ្យបានល្អប្រសើរ តាមរយៈការអនាម័យ ការរស់នៅ ហូបស្អាត ផឹកស្អាត រស់នៅស្អាត ព្រមទាំងធ្វើលំហាត់ប្រាណ ដើម្បីបន្តរស់នៅបានយូរអង្វែង ដើម្បីបន្តរង់ចាំមើលការអភិវឌ្ឍរីកចម្រើនឥតឈប់ឈររបស់ប្រទេសជាតិយើងក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី។

អំណោយដែលយកទៅប្រគល់ជូនគ្រួសារក្រីក្រទាំង៣០គ្រួសារ ក្នុងមួយគ្រួសារទទួលបានអង្ករ៣០គីឡូក្រាម មី១កេស ត្រីខ១០កំប៉ុង ឃីត១កញ្ចប់ និងថវិកា ៣ម៉ឺនរៀល។

ជាមួយគ្នាលោកអភិបាលក៏បានឧបត្ថម្ភបន្ថែមដល់លោកមេភូមិម៉ឺនត្រា សង្កាត់ស្ពានថ្ម ដែលកំពុងមានជំងឺ ថវិកា ៣៣ម៉ឺនរៀលផងដែរ។

បន្ទាប់មក លោកអភិបាលខណ្ឌ ក៏បានបន្តដំណើរនាំយកអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ទៅប្រគល់ជូនគ្រួសារ លោក ឯក ប៊ុនធឿន រស់នៅក្នុងភូមិទ័ពបោះ ដែលមានជីវភាពក្រីក្រ និងរស់នៅក្រោមតង់ ព្រមទាំងមានកូនតូចៗចំនួន៣នាក់ នូវអង្ករ៣០គីឡូក្រាម មី១កេស ត្រីខ១០កំប៉ុង ឃីត០១កញ្ចប់ និងថវិកា ៥០ម៉ឺនរៀល តាមការអំពាវនាវតាមរយៈវីឌីអូកុមារី ឯក សុទ្ធិការី ត្រូវជាកូន នៅក្នុងហ្វេសប៊ុក ឈ្មោះ Buntheoun Ek ផងដែរ៕

ដោយ៖ ជីម ភារ៉ា ដង្កោ