ខេត្តបាត់ដំបង ៖ ជនសង្ស័យជាមុខសញ្ញាជួញដូរគ្រឿងញៀន៣នាក់ ត្រូវកម្លាំងអាវុធហត្ថខេត្តបាត់ដំបងឃាត់ខ្លួនបានជាបន្តបន្ទាប់ ក្នុងប្រតិបត្តិការដែលបានធ្វើឡើងនៅថ្ងៃទី១ ខែកក្កដា ឆ្នាំ២០១៥ ក្នុងភូមិសំរោងអូរទ្រា ឃុំសំរោងក្នុង ស្រុកឯកភ្នំ ដោយបានរកឃើញថ្នាំញៀនមួយចំនួនជាវត្ថុតាង។
ប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យដែលត្រូវបានឃាត់ខ្លួនទាំង៣នាក់រួមមានទី១-ឈ្មោះ យស់ តុលា ហៅតុ អាយុ២៤ឆ្នាំ ជាមេខ្លោង មានទីលំនៅក្នុងភូមិសំរោងស្នោ ឃុំសំរោងក្នុង ស្រុកឯកភ្នំ, ទី២-ឈ្មោះ សឺត ឧត្តម អាយុ៣១ឆ្នាំ និងទី៣-ឈ្មោះ រិន ដាវី អាយុ២២ឆ្នាំ រស់នៅភូមិ-ឃុំជាមួយជនសង្ស័យទី១។
ប្រភពដដែលបានបន្តថា ការឃាត់ខ្លួនជនសង្ស័យខាងលើគឺកម្លាំងកងរាជអាវុធហត្ថក្រុងបាត់ដំបង សហការជាមួយកម្លាំងមូលដ្ឋានស្រុកឯកភ្នំ ឃាត់ខ្លួនបានជាបន្តបន្ទាប់ ក្នុងករណីជាក់ស្ដែង ក្រោយពីចំណាយពេលអស់ជាច្រើនម៉ោង។ នៅក្នុងប្រតិបត្តការនេះ កម្លាំងបានរកឃើញម្សៅក្រាមពណ៌ស ១កញ្ចប់ធំ មាទម្ងន់១,០៤៦ក្រាម។
បច្ចុប្បន្ន ជនសង្ស័យទាំង៣នាក់កំពុងឃុំខ្លួនបណ្ដោះអាសន្ននៅបញ្ជាការដ្ឋានអាវុធហត្ថខេត្តបាត់ដំបង ដើម្បីកសាងសំណុំរឿងចាត់ការបន្តតាមនីតិវិធី៕
