ភ្នំពេញ៖ បុរសម្នាក់ស្រវឹងស្រាជោកជាំបានបើករថយន្តកាមរីឆ្លាមមួយគ្រឿងក្នុងល្បឿនលឿនជ្រុលបុករថយន្តCRVពីក្រោយ ខណៈធ្វើដំណើរស្របទិសគ្នា បណ្តាលឲ្យរងការខូចខាតយ៉ាងដំណំ ។

ហេតុការណ៍នេះបានកើតឡើងកាលពីវេលាម៉ោង១១យប់ ថ្ងៃទី២៨ ខែកក្កដា ឆ្នាំ២០១៦ នៅចំណុចមុខវត្តវិហារឃួន តាមបណ្តោយផ្លូវមហាវិថីសហព័ន្ធរុស្សី ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ ។

តាមសាក្សីនៅកន្លែងកើតហេតុបានពោយដឹងថា មុនពេលកើតហេតុ គេបានឃើញរថយន្តម៉ាក CRV ពណ៌ទឹកប្រាក់ ពាក់ស្លាកលេខ ភ្នំពេញ 2AA-6583 បើកបរដោយបុរសជនជាតិចិនម្នាក់ ធ្វើណើរតាមបណ្តោយផ្លូវសហព័ន្ធរុស្សី ក្នុងទិសដៅពីលិចទៅកើត ខណៈមកដល់ចំណុចកើតហេតុ ក៏បានស៊ីញ៉ូបម្រុងបត់ឆ្វេង ភ្លាមនោះស្រាប់តែមានរថយន្តម៉ាកកាមរីឆ្លាម ពណ៌ទឹកប្រាក់ពាក់ស្លាកលេខ ភ្នំពេញ 2G 4122 បើកបរដោយបុរសម្នាក់ ធ្វើដំណើស្របទិសគ្នាក្នុងល្បឿនលឿនទាំងស្ថានភាពស្រវឹង បានជ្រុលបុករថយន្ត CRV ពីក្រោយពេញទំហឹងបណ្តាលឲ្យរងការខូចខាតទាំងសងខាងយ៉ាងដំណំ ។

ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ចំណុចកើតហេតុ និងសម្របសម្រួល ទើបភាគីទាំងសងខាងព្រមព្រៀងគ្នា យករថយន្តទៅជួសជុលខ្លួនឯង ៕

ដោយ៖ សុខាសែនជ័យ