ភ្នំពេញ៖ លោក កើត ឆែ អភិបាលរង នៃគណៈអភិបាលរាជធានីភ្នំពេញ បានថ្លែងថា ដើម្បីក្លាយជាមេដឹកនាំ ឬ «មេគេ» យើងត្រូវមានគុណសម្បត្តិយ៉ាងហោចណាស់ចំនួន ៣ចំណុច។ ការថ្លែងបែបនេះរបស់លោក កើត ឆែ នាឱកាសលោកតំណាងឱ្យ លោក ឃួង ស្រេង អភិបាល នៃគណៈអភិបាលរាជធានីភ្នំពេញ ក្នុងពិធីបើក «វគ្គបណ្តុះបណ្តាលស្តីពីការពង្រឹង និងអភិវឌ្ឍសមត្ថភាពដឹកនាំក្នុងអង្គភាព ប្រកបដោយសុខដុមនីយកម្ម» នៅថ្ងៃទី២៤ ខែកក្កដា ឆ្នាំ២០២៤នេះ ដោយមានការចូលរួមពីសិក្ខាកាមដែលជាបុគ្គលិក-មន្ត្រីរាជការ នៃរដ្ឋបាលរាជធានីភ្នំពេញ រដ្ឋបាលខណ្ឌ-សង្កាត់ និងមន្ទីរ-អង្គភាពជំនាញក្រោមឱវាទរដ្ឋបាលរាជធានីភ្នំពេញ សរុបចំនួន ២៨៣ នាក់។
លោក កើត ឆែ បានគូសបញ្ជាក់ថា ៣ចំណុច ដើម្បីក្លាយជាមេដឹកនាំ ឬ «មេគេ» ដូចខាងក្រោម៖
*ទី១៖ សមត្ថភាព (ទទួលបានការបណ្តុះបណ្តាល និងមានចំណេះដឹងក្នុងការស្វែងយល់អំពីការងារ និងមានភាពឈ្លាសវៃ, គំនិតផ្តួចផ្តើម និងនវានុវត្ត ដើម្បីសម្រេចការងារមួយ ប្រកបដោយគុណភាព និងប្រសិទ្ធផលខ្ពស់)។
*ទី២៖ បទពិសោធន៍ការងារ (ធ្លាប់ឆ្លងកាត់បទពិសោធន៍ការងារទាំងល្អ ទាំងមិនល្អ ដែលបទពិសោធន៍ទាំងនេះ គឺជាទុន ដើម្បីបំពេញការងារទៅថ្ងៃមុខ)។
*ទី៣៖ សុខភាពល្អ (ត្រូវថែរក្សាសុខភាព, មានរបបហាត់ប្រាណទៀងទាត់ ដើម្បីឱ្យមានភាពរហ័សរហួន ការបំពេញការងារបានល្អ)។
ឆ្លៀតក្នុងឱកាសនេះ លោក កើត ឆែ ក៏បានវាយតម្លៃខ្ពស់ និងចាត់ទុកថាការរៀបចំវគ្គបណ្តុះបណ្តាលលើប្រធានបទនេះ ពិតជាបានផ្តល់អត្ថប្រយោជន៍ និងរួមចំណែកដល់ការបំពេញការងាររបស់សិក្ខាកាម តាមរយៈការទទួលបាននូវទស្សនទាន និងធាតុចូលបន្ថែម ដែលជួយបណ្តុះស្មារតីទទួលខុសត្រូវ ការរៀបចំផែនការអនុវត្តការងារ ការជំរុញលើកទឹកចិត្ត និងការបង្ហាញពីគន្លឹះក្នុងការរៀបចំខ្លួនរបស់បុគ្គលិក-មន្រ្តីរាជការម្នាក់ៗ ឱ្យបំពេញការងារទទួលបានលទ្ធផលល្អប្រសើរ ប្រកបដោយគុណតម្លៃ ក្នុងអាជីពការងាររបស់ខ្លួន៕ដោយ៖តារា
