ជនជាតិអាមេរិកមួយចំនួនធំបានតវ៉ាទាមទារឱ្យបញ្ឈប់ជំនួយយោធាដល់អុីស្រាអែល និងកាន់ទង់ជាតិប៉ាឡេស្ទីននៅទីក្រុងវ៉ាស៊ីនតោន ខណៈដែលនាយករដ្ឋមន្រ្តីអុីស្រាអែលលោក Benjamin Netanyahu កំពុងនិយាយនៅឯកាពីតូលកាលពីថ្ងៃពុធ (24 ខែកក្កដា) ។

ដោយស្វែងរកការគាំទ្រពីសមាជិកសភាអាមេរិកសម្រាប់សង្គ្រាមអុីស្រាអែលនៅហ្គាហ្សា លោក Netanyahu បានគូសបញ្ជាក់អំពីផែនការមិនច្បាស់លាស់មួយសម្រាប់តំបន់ហ្គាហ្សាក្រោយសង្រ្គាម “បំផ្លិចបំផ្លាញ” និងបានចង្អុលបង្ហាញអំពីសម្ព័ន្ធភាពដ៏មានសក្តានុពលរវាងអុីស្រាអែល និងសម្ព័ន្ធមិត្តអារ៉ាប់របស់អាមេរិក។
គាត់គ្រោងនឹងជួបជាមួយប្រធានាធិបតី Joe Biden និងអនុប្រធានាធិបតី Kamala Harris នៅថ្ងៃព្រហស្បតិ៍ និងជាមួយអតីតប្រធានាធិបតី Donald Trump នៅថ្ងៃសុក្រ។
ប៉ូលិសបាននិយាយនៅក្នុងសេចក្តីថ្លែងការណ៍មួយថា “ហ្វូងមនុស្សមិនបានគោរពតាមបញ្ជារបស់យើងឱ្យនៅឱ្យឆ្ងាយពីជួរប៉ូលិស។ យើងនឹងបាញ់ថ្នាំអ្នកណាម្នាក់ដែលព្យាយាមបំពានច្បាប់ហើយឆ្លងកាត់បន្ទាត់នោះ”។
Sarah Bowles អ្នកបច្ចេកទេសឱសថស្ថានមកពី Delaware ដែលបានចូលរួមការតវ៉ាបាននិយាយថា “យើងមិនមែនជាការគំរាមកំហែងទេ” ។ ក្រុមអ្នកតវ៉ាមួយបាននិយាយថា ប៉ូលិសបានវាយប្រហារក្រុមអ្នកតវ៉ាខណៈពួកគេដើរក្បួន។
ក្រុមគាំទ្រប៉ាឡេស្ទីននិងនិស្សិតមហាវិទ្យាល័យបានធ្វើការតវ៉ាជាច្រើនខែនៅក្នុងសហរដ្ឋអាមេរិកប្រឆាំងនឹងសង្រ្គាមរបស់អុីស្រាអែលនៅតំបន់ហ្គាហ្សា ជាកន្លែងដែលអាជ្ញាធរសុខាភិបាលបាននិយាយថា ប្រជាជនប៉ាឡេស្ទីនជិត 40,000 នាក់បានស្លាប់៕ ដោយធីរីណា

រូបថត​: Reuters