មកទល់នឹងពេលនេះ លោក ហេង សំហៃ ត្រូវបានទៅកាន់តំណែងជាប្រធានការិយាល័យគយ និងរដ្ឋាករកែវផុស នៃសាខាគយ និងរដ្ឋាករខេត្តព្រះសីហនុ ជំនួសលោក នុត លីឆួយ មានរយៈពេលជិត៣សប្តាហ៍ បើគិតចាប់ពីថ្ងៃទី៧ ខែកក្កដា ឆ្នាំ២០១៦ មកទល់នឹងថ្ងៃទី២៨ ខែកក្កដា ឆ្នាំ២០១៦ ។

មន្ត្រីបានលួចខ្សឹបថា លោក ហេង សំហៃ បានទទួលខុសត្រូវលើការពង្រឹង ទប់ស្កាត់ទំនិញគេចពន្ធ យកចិត្តទុកដាក់ប្រមូលពន្ធជូនរដ្ឋ សហការជាមួយសមត្ថកិច្ច ស្ថាប័នដទៃឲ្យមានតម្លាភាព ស្របតាមគោលការណ៍របស់អគ្គនាយកដ្ឋានគយ និងរដ្ឋាករកម្ពុជា ក៏ដូចជាក្រសួងសេដ្ឋកិច្ច និងហិរញ្ញវត្ថុ ប៉ុន្តែក្នុងរយៈពេលជិត៣សប្តាហ៍ ក្នុងតំណែងនេះ ត្រូវបានគេរាយការណ៍មកថា ទំនិញគេចពន្ធ បានលួចហូរចូលយ៉ាងគគ្រឹកគគ្រេងផងដែរ ដោយគេសង្ស័យថា អាចនឹងមានការបើកភ្លើងខៀវណាមួយពីលោក ហេង សំហៃ មេគយដែលទើបទៅកាន់តំណែងថ្មីថ្មោង ។

ជាទូទៅ ត្រូវបានគេដឹងថា ទំនិញគេចពន្ធទាំងនោះ រួមមានជាស៊ីម៉ង់ត៍ ម៉ូតូ ចំណីជ្រូក ដែក និងគ្រឿងសំណង់ ជ័រ និងកៅ ស្ករស នេះជាដើម ។ ការហូរចូលទំនិញគេចពន្ធអាចធ្វើបែបបទបង់ពន្ធ ជាលក្ខណៈទំនិញចម្រុះ ប៉ុន្តែធាតុពិត សុទ្ធតែជាប្រភេទទំនិញនាំចូលបង់ពន្ធខ្ពស់ ។ ដូច្នេះ បើលោកហេង សំហៃ ពិតជាធូរលុង ដូចការទម្លាយមែននោះ អាចនឹងធ្វើឲ្យរដ្ឋត្រូវបាត់បង់ចំណូលពន្ធនាំចូលយ៉ាងច្រើនក្នុងមួយខែៗ ។

ចំពោះអំពើរត់ពន្ធទាំងនេះ ជាការដិតដាម សល់អំពីកម្អែលមើលគយចាស់កន្លងទៅ គឺលោក នុត លីឆួយ ហើយនិងឈ្មួញ ដែលមានមុខដដែលៗ ធ្លាប់រកស៊ីដឹកជញ្ជូនដោយជោគជ័យសម្រាប់ច្រកមួយនេះ ។ មន្ត្រីសង្ឃឹមថា ថ្នាក់ដឹកនាំអគ្គនាយកដ្ឋានគយ និងរដ្ឋាករកម្ពុជា អាចនឹងដាក់ភាពសង្ស័យ ស៊ើបអង្កេតតាមដាន ចំពោះការបង្ហើបទាំងនេះ ដើម្បីការពារផលប្រយោជន៍ចំណូលពន្ធរបស់រដ្ឋសម្រាប់ជាការទ្រទ្រង់សេដ្ឋកិច្ចជាតិ ៕