ខេត្តបន្ទាយមានជ័យ៖ រថយន្តដឹកទំនិញមួយគ្រឿងបានបុកសិស្សវិទ្យាល័យនិមិត្តម្នាក់ឱ្យស្លាប់និង២នាក់ ទៀតរងរបួសធ្ងន់នៅល្ងាចថ្ងៃទី៣១ ខែកក្តដា ឆ្នាំ២០២៤ តាមបណ្តោយផ្លូវជាតិលេខ៥ ស្ថិតក្នុងភូមិកូនដំរី សង្កាត់និមិត្ត ក្រុងប៉ោយប៉ែត។

នគរបាលជំនាញបានឱ្យដឹងថា មុនគ្រោះថ្នាក់ចរាចរណ៍កើតឡើង មានសិស្សវិទ្យាល័យនិមិត្តបានជិះម៉ូតូជាច្រើនគ្រឿងចេញពីសាលាតាមបណ្តោយផ្លូវជាតិលេខ៥ក្នុងទិសដៅពីកើតទៅលិច ខណៈនោះក៏មានរថយន្តដឹកទំនិញប្រភេទ៣តោនបើកបរក្នុងទិសដៅពីលិចទៅកើតបញ្ច្រាសទិសគ្នាដែរ លុះបើកមកដល់ចំណុចកើតហេតុរថយន្តបានរេចង្កូតទៅបុកសិស្សដែលកំពុងជិះម៉ូតូពីរគ្រឿងក្រោយគេបណ្តាលឱ្យរបួសធ្ងន់២នាក់ ស្រីម្នាក់បាក់ជើងម្ខាង និងបុរសម្នាក់ចូលក្រោមរថយន្តកិនបាក់ជើងម្ខាងនិងដៃម្ខាង មានឈាមហូរចេញតាមមាត់និងត្រចៀក ច្រមុះត្រូវបានដឹកយកទៅសង្គ្រោះបន្ទាន់នៅមន្ទីរពេទ្យ តែដោយស្ថានភាពធ្ងន់ធ្ងរពេកត្រូវបានស្លាប់បាត់បង់ជីវិតតែម្ដង។
ក្រោយគ្រោះចរាចរណ៍ភ្លាមៗគេឃើញកម្លាំងនគរបាលប៉ុស្តិ៍រដ្ឋបាលសង្កាត់និមិត្តបានចេញមកសម្រួលចរាចរណ៍។ ចំពោះរថយន្តបង្កហេតុនិងមូតូត្រូវកម្លាំងនគរបាលចរាចរណ៍យកទៅរក្សាទុកដើម្បីអនុវត្តតាមច្បាប់ចរាចរណ៍៕ ដោយវណ្ណា