ភ្នំពេញ៖ ថ្លែងនៅក្នុងពិធីទទួលវត្ថុបុរាណខ្មែរ ដែលបានប្រគល់ជូនកម្ពុជាវិញ នាព្រឹកថ្ងៃទី២២ ខែសីហា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានមានប្រសាសន៍ថា៖ ប្រសិនបើកម្ពុជាមិនមាននូវសុខសន្តិភាព ពេញលេញនាពេលបច្ចុប្បន្នទេ កម្ពុជាក៏មិនទាន់មានឱកាសនាំមកនូវព្រលឹងដូនតាខ្មែរជាបន្តបន្តាប់មកប្រទេសរបស់ខ្លួនវិញដែរ បន្ទាប់ពីបែកបាក់ដោយសារសង្រ្គាមនោះ។
សម្ដេចធិបតី បានគូសបញ្ជាក់យ៉ាងដូច្នេះថា ប្រសិនបើកម្ពុជាមិនមានសង្គ្រាមស៊ីវិលទេនោះ ក៏គ្មានជនមានឱកាសណាអាចលួចសម្បត្តិវប្បធម៌ជាតិរបស់កម្ពុជាទៅលក់ឱ្យប្រទេសផ្សេងបានដែរ ដូច្នេះ សម្តេចបានចាត់ទុកថា ការទទួលបានវត្ថុបុរាណខ្មែរមកវិញជាបន្តបន្ទាប់នាពេលនេះ គឺជាការជួបជុំនៃដួងព្រលឹងដូនតាខ្មែរ ដែលបានបន្សល់ទុកឱ្យកូនចៅខ្មែរ ក្រោយពីកម្ពុជាបានរួចផុតពីភ្លើងសង្គ្រាម និងនាំឱ្យប្រទេសមានសុខសន្តិភាពពេញលេញនាពេលបច្ចុប្បន្ននេះ។
សម្តេចធិបតី បានថ្លែងបន្តថា កត្តាសន្តិភាពមិនមែនតែមនុស្សធម្មតា ត្រូវការតែប៉ុណ្ណោះទេ សូម្បីតែគ្រូសារអាទិទេពក៏ត្រូវការដែរដើម្បីស្វែងរកឱកាសបានជួបជុំគ្នាវិញ ហើយបើសព្វថ្ងៃ បើកម្ពុជាមិនមាននូវសុខសន្តិភាពទេ បណ្តាប្រទេសជាមិត្តក៏គេមិនបានប្រគល់នូវវត្ថុបុរណ និងព្រលឹងដូនតាខ្មែរយើងឱ្យមកប្រទេសកម្ពុជាវិញដែរ ដូច្នេះហើយយើងទាំងអស់គ្នាត្រូវតែថែរក្សា ការពារនូវសុខសន្តិភាពនេះឱ្យខាងតែបានបើទោះបីជាតម្លៃណាក៏ដោយ។
សម្តេចធិបតី ថ្លែងបន្ថែមថា រហូតមកដល់ពេលនេះកម្ពុជាបាននាំយកនូវវត្ថុបុរាណ ដែល ជាដួងព្រលឹងដូនតាខ្មែរមកមាតុប្រទេសវិញចំនួនជាងមួយពាន់រូបហើយ ពីប្រទេសចំនួន១៥ ដោយក្នុងនោះពីប្រទេសបារាំង អាមេរិក កាណាដា អូស្រ្តាលី ជប៉ុន ថៃ និងប្រទេសមួយចំនួនទៀត។
នៅក្នុងឱកាសក្នុងពិធីទទួលវត្ថុបុរាណខ្មែរ ដែលបានប្រគល់ជូនកម្ពុជាវិញនេះដែរ សម្តេចធិបតី ហ៊ុន ម៉ាណែត នាយករដ្ឋមន្រ្តីក៏ លើកឡើងផងដែរថា ក្នុងនាមប្រជាជនកម្ពុជាទាំងមូលសម្តេចពិតជាមានមោទនភាព និងសេចក្តីរំភើបរីករាយឥតឧបមា ជាមួយនឹងការអបអរសាទរអស់ពីដួងចិត្ត ចំពោះការវិលត្រឡប់មកវិញនូវរតនសម្បត្តិវប្បធម៌ដែលជាព្រលឹងដូនតាខ្មែរ និងជាអត្តសញ្ញាណជាតិ ក្រោមម្លប់នៃសុខសន្តិភាពនាថ្ងៃនេះផងដែរ ហើយជាមួយគ្នានោះសម្តេចធិបតី ក៏បានបង្ហើបឲ្យដឹងផងដែរថា នាពេលនេះក្រ សួងវប្បធម៌ និងវិចិត្រសិល្បៈកម្ពុជាក៏បានកំពុងខិតខំសម្របសម្រួលនាំមកនូវវត្ថុបបុរណាខ្មែរ ដែលត្រូវបានចោរលួយយកទៅលក់ ឲ្យបរទេសចំនួន ៧៦ទៀតនាំមកប្រទេសកម្ពុជាវិញនាពេលឆាប់ៗខាងមុខនេះផងដែរ៕ដោយ៖តារា
