ខេត្តស្វាយរៀង ៖ យុវជន៣នាក់ បើកម៉ូតូឌុបគ្នាដើរលេង បោះពួយល្បឿនលឿន វ៉ាជែងជ្រុលទៅបុកចូលរថយន្តក្រឡុកសុីម៉ងត៍ កំពុងបើកបញ្ច្រាសទិសគ្នាបណ្តាលឲ្យស្លាប់២នាក់ ម្នាក់របួសធ្ងន់ ។ ហេតុការណ៍គ្រោះថ្នាក់ចរាចរណ៍នេះបានកើតឡើង កាលពីម៉ោង១០និង៤៥នាទីព្រឹកថ្ងៃទី២២ ខែសីហា ឆ្នាំ២០២៤ នៅតាមផ្លូវជាតិលេខ១ (ចន្លោះគីឡូម៉ែត្រលេខ១៣៧-១៣៨) ចំណុចភូមិបន្ទាយ ឃុំកណ្តៀងរាយ ស្រុកស្វាយទាប ខេត្តស្វាយរៀង ។

ប្រភពព័ត៌មានបានឲ្យដឹងថា មុនពេលកើតហេតុ ម៉ូតូហុងដាឌ្រីម ពណ៌ខ្មៅ ពាក់ស្លាកលេខ ស្វាយរៀង 1I-2368 បើកឌុបគ្នា៣នាក់ បោះពួយល្បឿនលឿន ក្នុងទិសដៅពីលិចទៅកើត ដល់ចំណុចកើតហេតុ បានវ៉ាជែងរថយន្តខាងមុខ ក៏ជ្រុលបុកចូលរថយន្តដឹកបេតុង ពណ៌ស ពាក់ស្លាកលេខ ស្វាយរៀង 5A-2282 កំពុងបើកពីកើតទៅលិចបញ្ច្រាសទិសគ្នា បណ្តាលឱ្យយុវជន២នាក់ ស្លាប់ភ្លាមៗនៅកន្លែង ចំណែកយុវជនម្នាក់ជាអ្នកបើកម៉ូតូ រងរបួសស្រាល ។

ប្រភពព័ត៌មាននៅកន្លែងកើតហេតុបានឱ្យដឹងទៀតថា ជនរងគ្រោះដែលរងរបួសម្នាក់គឺទើបតែស្គាល់គ្នាជាមួយយុវជនដែលបានស្លាប់២នាក់ បាន២ថ្ងៃទេ សុំរាប់គ្នាជាមិត្តភក្តិ ទើបនៅព្រឹកកើតហេតុបានបើកម៉ូតូឌុបគ្នាដើរលេង ក៏ជួបគ្រោះថ្នាក់ចរាចរណ៍បណ្តាលឱ្យស្លាប់២នាក់តែម្តង ។

បន្ទាប់ពីកើតហេតុសមត្ថកិច្ចចុះទៅអន្តរាគមន៍ ជួយដឹកជនរងរបួសម្នាក់ទៅតសង្គ្រោះនៅមន្ទីរពេទ្យបង្អែកស្រុកស្វាយទាប ចំណែកសាកសពយុវជន២នាក់ ត្រូវបានសមត្ថកិច្ចស្រាវជ្រាវ ទំនាក់ទំនងរកក្រុមគ្រួសារ យកទៅធ្វើបុណ្យតាមប្រពៃណី ។ រីឯរថយន្តនិងម៉ូតូ ត្រូវបានសមត្ថកិច្ចវាស់វែងយកទៅរក្សាទុកនៅអធិការដ្ឋានស្រុកស្វាយទាប ដើម្បីរងចាំដោះស្រាយតាមនីតិវិធី ៕ដោយ៖ ជ្រោយពេជ្រ