ភ្នំពេញ ៖ អគ្គីភ័យឆាបឆេះផ្ទះលក់ភេសជ្ជៈបោះមួយកន្លែងយ៉ាងសន្ធោសន្ធៅបណ្ដាលឱ្យរងការខូចខាតសម្ភារៈទាំងស្រុង បង្កការភ្ញាក់ផ្អេីលដល់បងប្អូនប្រជាពលរដ្ឋ អ្នកធ្វេីដំណេីររាយការណ៍ទៅអាជ្ញាធរមានសមត្ថកិច្ចទាក់ទងទៅរថយន្តពន្លត់អគ្គិភ័យចុះអន្តរាគមន៍ភ្លាមៗ។
ហេតុការណ៍នេះបង្កមានការភ្ញាក់ផ្អើលនៅវេលាម៉ោង ០៩ នឹង ២០នាទីព្រឹកថ្ងៃទី ២២ ខែសីហា ឆ្នាំ២០២៤ នៅតាមបណ្តោយមហាវិថីចោមចៅ ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។
បើតាមប្រភពពីពលរដ្ឋបានឱ្យដឹងថា មុនកើតហេតុ គេឃើញមានផ្សែងហ៊ុយចេញពីផ្ទះលក់ភេសជ្ជៈបោះដុំ យីហោ ម៉ាក់ ស្រីពេជ្រ ស្របពេលនោះដែរ ក៏មានឮសម្លេងផ្ទុះជាច្រើនដង ចេញពីក្នុងផ្ទះខាងលើ ភ្លាមៗអ្នកនៅជិតកន្លែងកើតហេតុបាននាំគ្នាយកបំពង់ពន្លត់អគ្គីភ័យមកបាញ់ តែមិនអាចគ្រប់គ្រងបាន បង្កជាអណ្តាតភ្លេីងឆាបឆេះយ៉ាងសន្ធោសន្ធៅកាន់តែខ្លាំងឡើងៗ ធ្វើឱ្យប្រជាពលរដ្ឋពិបាកជួយក្នុងការពន្លត់ ក៏រាយការណ៍ជូនសមត្ថកិច្ចមូលដ្ឋាន ដើម្បីទាក់ទងទៅសមត្ថកិច្ចជំនាញ បង្កនិងពន្លត់អគ្គិភ័យមកជួយអន្តរាគមន៍បាញ់ពន្លត់ ។
ម្ចាស់ទីតាំង ឈ្មោះ ហួរ ថៃអេង ភេទប្រុស អាយុ ៥៥ឆ្នាំ ជនជាតិ ខ្មែរ មុខរបរ: មន្ត្រីរាជការ ។
ផ្ទះដែលត្រួវអគ្គិភ័យឆាបឆេះ ជាប្រភេទសំណង់: ថ្មប្រក់សង្ក័សី ទំហំ ១០ម៉ែត្រ X ១៦ម៉ែត្រ ។
ក្នុងហេតុការណ៍គ្រោះអគ្គិភ័យខាងលើនេះបណ្ដាលឱ្យឆាបឆេះផ្ទះចំនួន០១ខ្នងទាំងស្រុង ថែមទាំង រថយន្តឡិចសុីស ២០០T មួយគ្រឿង ,ម៉ូតូមិនស្គាល់ម៉ាក ០១គ្រឿង រួមនឹងសម្ភារៈលក់ដូរមួយចំនួនផងដែរ តែមិនបណ្តាលឱ្យមនុស្សរងរបួសនោះឡើយ ។
ចំពោះករណីឆាបឆេះនេះ រថយន្តពន្លត់អគ្គិភ័យបានមកដល់ទីតាំងចំនួន១៥គ្រឿង ប្រើប្រាស់ទឹកអស់ចំនួន ៤៥ឡាន ដោយក្នុងនោះមានរថយន្តពន្លត់របស់កងរាជអាវុធហត្ថ , រថយន្តរបស់ស្នងការរាជធានី , រថយន្តសួន ឧស្សហកម្មកាណាឌីយ៉ា , រថយន្តជំនួយស្រាបៀរកម្ពុជា, រថយន្តពន្លត់ របស់កងទ័ពពិសេស ៩១១ បានមកដល់ទីតាំងខាងលើ បាញ់ពន្លត់រហូតរលត់ជាស្ថាពរ ។ ចំពោះមូលហេតុ ក្រោយសមត្ថកិច្ចជំនាញស្រាវជ្រាវនឹងសន្និដ្ឋានថា គឺបណ្តាលមកពីឆ្លងចរន្តអគ្គិសនី ៕
អត្ថបទ៖ សុខាសែនជ័យ
