ភ្នំពេញ៖ ម៉ូតូហុងដាឌ្រីមមួយគ្រឿងជិះឆ្លងផ្លូវត្រូវម៉ូតូADV បុកបណ្ដាលឲ្យរងរបួសធ្ងន់ស្រាលចំនួន៣នាក់ត្រូវបានបញ្ជូនទៅសង្គ្រោះនៅមន្ទីរពេទ្យ កាលពីវេលាម៉ោង៩យប់និង២០នាទីយប់ ថ្ងៃទី១៣ ខែកញ្ញា ឆ្នាំ២០២៤ នៅទល់មុខក្រសួងរក្ខប្រមាញ់និងនេសាទ តាមបណ្តោយផ្លូវព្រះនរោត្ដម សង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកេីតហេតុ គេបានឃើញបុរស២នាក់ឪពុកកូនបានជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1FT 8478 ធ្វើដំណើរតាមបណ្ដោយផ្លូវព្រះនរោត្ដមទិសដៅពី ជើងទៅត្បូងលុះមកដល់ចំណុចកេីតហេតុ ក៏បានបត់ឆ្វេងឆ្លងផ្លូវបញ្ឆិតគោលបំណងចូលទៅច្រកចូលក្នុងផ្ទះ តែគាប់ជួនពេលនោះដែរក៏ស្រាប់តែបុរសម្នាក់ទៀតបានជិះម៉ូតូម៉ាកហុងដាADV ពណ៌ខ្មៅ ពាក់ស្លាកលេខ ភ្នំពេញ 1KU 2771 បានជិះបោះពួយតាមបណ្ដោយផ្លូវព្រះនរោត្ដមទិសដៅ បញ្ច្រាសគ្នាពីត្បូងទៅជេីង ក៏ជ្រុលទៅបុកគ្នាម៉ូតូហុងដាឌ្រីមដែលកំពុងឆ្លងផ្លូវយ៉ាងពេញទំហឹង បណ្ដាលឲ្យម៉ូតូទាំង២គ្រឿងរងការខូចខាតខ្ទេចផ្នែកខាងមុខយ៉ាងដំណំ ព្រមទាំងធ្វើឲ្យបុរសជាអ្នកជិះម៉ូតូADV រងរបួសបែកក្បាលហូរសន្លប់ស្តូក ចំនែកខាងម៉ូតូហុងដាឌ្រីមវិញ កូនជាអ្នកឌុបរងរបួសបែកក្បាលនិងបាក់ប្រអប់ជើងខាងស្ដាំ ដោយបុរសជាឪពុករបួសបែកមុខក្បាលហូរឈាម អ្នកទាំងបីត្រូវបានបញ្ជូនតាមរថយន្តសាមុយយកទៅសង្គ្រោះនៅមន្ទីរពេទ្យរុស្ស៊ីផងដែរ ។
ក្រោយពេលកេីតហេតុ ដោយតែមិនមានដំណោះស្រាយម៉ូតូទាំង២គ្រឿងត្រូវសមត្ថកិច្ចជំនាញវាស់វែងយកទៅរក្សាទុកនៅអធិការដ្ឋាននគរបាលខណ្ឌចំការមនរងចាំដំណោះស្រាយនៅពេលក្រោយជាបន្ត ៕ដោយ៖សុខាសែនជ័យ
