ភ្នំពេញ៖ តារាចម្រៀងប្រចាំព្រះរាជាណាចក្រកម្ពុជាពីររូបគឺលោក ខេមរៈ សិរីមន្ត និងកញ្ញា សុខ ពិសី បានរួមគ្នាជាមួយនឹងតារាចម្រៀងប្រចាំព្រះរាជាណាចក្រថៃគឺលោក ទីក ស៊ីរ៉ូ (Tik Shiro) ធ្វើឲ្យកក្រើកជាមួយការគាំទ្រយ៉ាងច្រើនកុះករក្នុងកម្មវិធីប្រគុំតន្ត្រី «ខ្មែរញញឹម» ដែលរៀបចំដោយស្ថានីយទូរទស្សន៍ប៉ុស្តិ៍លេខ៥។ កម្មវិធីនេះត្រូវបានធ្វើឡើងកាលពីល្ងាចថ្ងៃទី០៥ ខែសីហា នៅក្នុងបរិវេនសង្វៀន TIFFY ARINA ខណ្ឌជ្រោយចង្វា ក្រោមវត្តមានអ្នកគាំទ្រជាច្រើនពាន់នាក់។

បទចម្រៀងមនោសញ្ចេតនា និងញាក់កន្ត្រាក់អារម្មណ៍ដ៏ពេញនិយមជាច្រើនបទរបស់របស់តារាចម្រៀងទាំងបីរូបខាងលើបានបង្កើតឲ្យមានសំឡេងហ៊ោកញ្ជៀវយ៉ាងកងរំពងពីអ្នកទស្សនា។  អ្នកផលិតកម្មវិធីរបស់ស្ថានីយទូរទស្សន៍ប៉ុស្តិ៍លេខ៥ បានបញ្ជាក់ថា ការអញ្ជើញសិល្បករល្បីឈ្មោះនៃព្រះរាជាណាចក្រកម្ពុជានិងព្រះរាជាណាចក្រថៃឲ្យមកច្រៀងរួមគ្នាលើឆាកតែមួយនេះគឺដើម្បីបង្កើតទស្សនីយភាពប្លែកភ្នែកសម្រាប់ទស្សនិកជន។

ប្រភពបន្តថា ការអញ្ជើញលោក ទីក ស៊ីរ៉ូ (Tik Shiro) មកច្រៀងនៅកម្ពុជានេះដែរក៏ព្រោះតែតារាចម្រៀង និងតារាសម្តែងរូបនេះត្រូវបានស្គាល់ច្រើនដោយប្រជាជនខ្មែរអស់ជាច្រើនឆ្នាំមកហើយ ហើយលោកស្វាគមន៍ចំពោះការប្រគុំតន្ត្រីរួមគ្នាជាមួយសិល្បករកម្ពុជាផងដែរ។ អ្នកគ្រប់គ្រងកម្មវិធីខាងលើបន្តថា ចាប់ពីខែនេះទៅស្ថានីយទូរទស្សន៍ប៉ុស្តិ៍លេខ៥ នឹងបង្កើតឲ្យមានព្រឹត្តិការណ៍ប្រគុំតន្ត្រីដែលមានសិល្បករថៃ និងកម្ពុជារួមគ្នាយ៉ាងហោចណាស់មួយខែម្តងរៀងរាល់ថ្ងៃសុក្រដើមខែនីមួយៗបូករួមទាំងបើកឲ្យមានការតាំងពិព័រណ៍ផលិតផលថៃរយៈពេលបីថ្ងៃនៅដើមខែនោះផងដែររហូតដល់ដំណាច់ឆ្នាំ២០១៦នេះ ដែលស្ថានីយទូរទស្សន៍រំពឹងថា នឹងមានអ្នកទស្សនា ក៏ដូចជាអតិថិជនដែលធ្លាប់គាំទ្រផលិតផល និងអាហារនៃព្រះរាជាណាចក្រថៃ គាំទ្រកាន់តែច្រើនចូលរួម។ ប្រភពបន្តទៀតថា នៅដើមខែក្រោយស្ថានីយទូរទស្សន៍នឹងអញ្ជើញតារាចម្រៀងថៃពីររូបផ្សេងទៀតដើម្បីចូលរួមច្រៀងជាមួយនឹងតារាចម្រៀងល្បីឈ្មោះនៅកម្ពុជាផងដែរ។

តារាចម្រៀង និងតារាសម្តែង ទីក ស៊ីរ៉ូ (Tik Shiro) ដែលប្រជាជនខ្មែរធ្លាប់បានស្គាល់តាមរយៈការសម្តែងខ្សែភាពយន្តជាយូរមកហើយនោះបានបញ្ជាក់ថា លោកពិតជាមានអារម្មណ៍រំភើបរីករាយក្នុងការបានធ្វើដំណើរមកកាន់កម្ពុជាជាថ្មីកាលពីថ្ងៃទី០៥ ខែសីហា នេះដើម្បីបានច្រៀងរួមជាមួយនឹងសិល្បករកម្ពុជា។ លោកបន្តថា នេះគឺជាលើកទី៤ ហើយ ដែលលោកបានមកកម្ពុជា ទាំងការច្រៀង និងដំណើរកម្សាន្ត។

សិល្បករថៃវ័យ៥៥ឆ្នាំរូបនេះបញ្ជាក់ដែរថា លោកពិតជាចាប់អារម្មណ៍កម្ពុជា ជាមួយនឹងការរីកចម្រើនប្លែក បូករួមទាំងវិស័យសិល្បៈវប្បធម៌ដ៏សម្បូរបែបរបស់ខ្មែរ។ ម្ចាស់បទ «ម៉ាចយកាន់» រូបនេះបញ្ជាក់ដែរថា លោកពិតជារីករាយខ្លាំងនៅពេលដែលជួបអ្នកគាំទ្រយ៉ាងច្រើននៅកម្ពុជា ហើយលោកនៅតែរីករាយនឹងបន្តការវិលត្រឡប់មកកាន់កម្ពុជាជាថ្មីប្រសិនបើឱកាសល្អផ្តល់ឲ្យ ៕

ដោយ៖ វឌ្ឍនា