ភ្នំពេញ៖ មានករណីចោរប្រដាប់អាវុធភ្ជង់ប្លន់យកម៉ូតូពីយុវជនម្នាក់យកម៉ូតូហុងដាឌ្រីមសេ១២៥ ក្បែរវត្តអង្គតាមុិញ តាំងពីក្បាលព្រលប់មិនទាន់បានប៉ុន្មានម៉ោងផង នៅវេលាម៉ោង១នឹង២០នាទីរំលងអាធ្រាតឈានចូលថ្ងៃទី៧ ខែសីហា ឆ្នាំ២០១៦ មិនឆ្ងាយពីកន្លែងកើតហេតុដំបូងឡើយ គឺមានករណីភ្ជង់ប្លន់យកកាបូបលុយពីស្រ្តីម្នាក់ដែលជាអតីតតារាសម្តែងម្នាក់ ខណះជិះរថយន្តដល់ខាងមុខផ្ទះទៅហើយនោះ ស្ថិតក្នុងភូមិព្រៃល្វា ស្ថិតក្នុងសង្កាត់កាកាប ខណ្ឌពោធិ៍សែនជ័យ។

ស្រ្តីរងគ្រោះមានឈ្មោះជុំ សុផាន់នី អាយុ៣១ឆ្នាំ ជាអតីតតារាសម្តែង ហើយសព្វថ្ងៃធ្វើការនៅខារ៉ាអូខេទីក្រុងមាស បច្ចុប្បន្នស្នាក់នៅកន្លែងកើតហេតុខាងលើ។

បើតាមការរៀបពីស្រ្តីរងគ្រោះទាំងសភាពភ័យតក់ស្លុតបានអោយដឹងថា នៅមុនពេលកើតហេតុគាត់ចេញពីធ្វើការនៅក្នុងខារ៉ាអូខេទីក្រុងមាស ដោយបានជិះរថយន្តកាមេរី ពណ៍ឈាមជ្រូក ពាក់ស្លាកលេខ ភ្នំពេញ 2N 9430 ជិះបំណងត្រឡប់មកផ្ទះ ខណះមកដល់ខាងមុខផ្ទះទៅហើយនោះ និងកំពុងរង់ចាំអ្នកផ្ទះបើកទ្វារអោយ ពេលនោះស្រាប់តែមានជនសង្ស័យ២នាក់ ជិះម៉ូតូមិនចាំម៉ាកបានយកកាំភ្លើងខ្លីភ្ជង់ប្លន់យកកាបូបស្ពាយ និងបានអាមេបញ្ចូលគ្រាប់បាញ់មកលើរូបគាត់ថែមទៀតផង ដោយអោយដោះគ្រឿងអលង្ការៈ តែសំណាងល្អបាញ់មិនចេញ ហើយក៏ជិះគេចខ្លួនបាត់ស្រមោលតែម្តង។

ក្រោយកើតហេតុបានជិត១ម៉ោងទើបផ្អើលដល់សមត្ថកិច្ចមូលដ្ឋានមកនាំស្រ្តីរងគ្រោះទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលកាកាប ចំណែករបស់ដែលបាត់បង់មានទូរស័ព្ទដៃ៣គ្រឿង គ្រឿងអលង្ការ ថវិការមួយចំនួន ដែលសរុបជិត១ពានដុល្លារ៕

ដោយ៖ សុខាសែនជ័យ