ភ្នំពេញ៖ មានករណីគ្រោះថ្នាក់ចរាចរណ៍មួយរវាងរថយន្ត និងម៉ូតូ បណ្តាលឲ្យម្ចាស់ម៉ូតូរងរបួសដៃ រួចដើរទៅមន្ទីរពេទ្យកាល់ម៉ែត្រព្យាបាលរបួសដោយខ្លួនឯង កាលពីវេលាម៉ោង ៩យប់ ថ្ងៃទី៧ ខែតុលា ឆ្នាំ២០២៤ ស្ថិតនៅតាមបណ្តោយមហាវិថីព្រះមុនីវង្ស ស្ថិតនៅទល់មុខសាលារាជធានីភ្នំពេញ សង្កាត់វត្តភ្នំ ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុមានរថយន្តតូយូតាព្រូស១គ្រឿង បានបើកបរតាមបណ្តោយមហាវិថីព្រះមុនីវង្ស ក្នុងទិសដៅពីត្បូងទៅជើង ដោយរថយន្តខាងលើ មានពណ៌ទឹកប្រាក់ពាក់ផ្លាកលេខ ភ្នំពេញ 2AX-2079 លុះមកដល់ចំណុចទល់មុខសាលារាជធានីភ្នំពេញ រថយន្តក៏បានបើកទៅស្ដាំដើម្បីឈប់និយាយទូរស័ព្ទ ។
បេីតាមប្រភពបានបន្តថា បន្ទាប់មកគេបានឃើញបុរសម្នាក់ ជិះម៉ូតូហុងដាគុប ដែលមានផ្លាកលេខ ស៊េរីចាស់ ធ្វើដំណើរតាមបណ្តោយមហាវិថីព្រះ មុនីវង្ស ទិសដៅត្បូងទៅជើង ស្របទិសគ្នាពីក្រោយរថយន្ត លុះមកដល់ក្បែររថយន្តក៏បានជ្រុលចង្កូត ទៅប៉ះជាមួយរថយន្តចំស្តុបផ្នែកខាងឆ្វេង បណ្តាលឲ្យដួលម៉ូតូរងរបួសដៃខាងស្តាំ រួចម្ចាស់ម៉ូតូ បានដើរទៅមន្ទីរពេទ្យកាល់ម៉ែត្រ ដើម្បីព្យាបាលរបួសដោយខ្លួនឯង ដោយបន្សល់ទុកម៉ូតូរបស់ខ្លួននៅកណ្តាលផ្លូវ ។
ក្រោយពេលកើតហេតុ សមត្ថកិច្ចមូលដ្ឋានក៏បានមកដល់ ព្រមទាំងបានធ្វើការវាស់វែង និងយកម៉ូតូទៅគៀន ដើម្បីរង់ចាំម្ចាស់ម៉ូតូត្រឡប់មកវិញ ដើម្បីដោះស្រាយគ្នាតាមនីតិវិធីនៅពេលក្រោយ៕
ដោយ ៖ ភារ៉ា ដង្កោ
