ខេត្តកំពត ៖ បេក្ខជនប្រឡងបាក់ឌុប ១រូប នៅមណ្ឌលអនុវិទ្យាល័យជុំក្រៀល ខេត្តកំពត បានជួបគ្រោះថ្នាក់ចរាចរណ៍ ត្រូវបានរថយន្តពេទ្យជូនមកដល់មណ្ឌលប្រឡង នាម៉ោង ៧:៤០នាទី។ ក្រោយបញ្ចប់ការប្រឡងមុខវិជ្ជាទី១ (ផែនដីវិទ្យា និងបរិស្ថាន) បេក្ខជនត្រូវគ្រូពេទ្យប្រចាំមណ្ឌល ជួយពិនិត្យបន្ថែម និងលាងរបួស។
សូមបញ្ជាក់ថា ៖ ការប្រឡងបាក់ឌុបឆ្នាំនេះ លោកអភិបាលខេត្តកំពតបានណែនាំ ឲ្យអាជ្ញាធរក្រុងស្រុកទាំង៣ ដែលមានមណ្ឌលប្រឡង (ស្រុកទឹកឈូ អង្គរជ័យ និងក្រុងកំពត) ត្រូវយកចិត្តទុកដាក់ ជួយសម្រួលដល់បេក្ខជនមកពីក្រួសារក្រីក្រ ឲ្យអស់ពីលទ្ធភាព ដោយផ្តល់កន្លែងស្នាក់នៅ និងអាហារហូបចុកនៅតាមមណ្ឌលនីមួយៗ ក្នុងនោះឯកឧត្តម និងលោកជំទាវក៏បានផ្តល់អង្ករ និងម្ហូបអាហារមួយចំនួនទៅដល់អាជ្ញាធរក្រុងស្រុក ដើម្បីយកទៅចាត់ចែងចម្អិន ចែកជូនដល់អាណាព្យាបាល និងបេក្ខជនមកពីគ្រួសារក្រីក្រ រាល់ពេលចប់ម៉ោងប្រឡង។
កាប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី ៨ តុលា ២០២៤ ខេត្តកំពតមានមណ្ឌលប្រឡងសរុប ១០មណ្ឌល(ក្រុងកំពត ៤, ស្រុកទឹកឈូ៣ និងស្រុកអង្គរជ័យ៣) មាន២១០បន្ទប់ មានបេក្ខជនសរុប៥១៩៤នាក់ ស្រី ២៨២១នាក់ ក្នុងនោះបេក្ខជនស្វៃរិន ៣៥០នាក់ ស្រី១៦១នាក់ ដោយបែងចែកជា ថ្នាក់វិទ្យាសាស្ត្រ៖ មាន៣មណ្ឌល ៥៤បន្ទប់ បេក្ខជនចំនួន ១៣២៩នាក់ ស្រី ៨២៥នាក់ និងថ្នាក់វិទ្យាសាស្ត្រសង្គម៖ មាន ០៧មណ្ឌល ១៥៦បន្ទប់ បេក្ខជនចំនួន ៣៩៣១នាក់ ស្រី ២០១២ នាក់។
ដោយឡែក បេក្ខជន ធា សៀវវ៉ុង ជួបគ្រោះថ្នាក់ចរាចរណ៍មុនប្រឡង ដោយ របួសបាក់ជើង ប៉ុន្តែនៅ តែអាច ទៅ ប្រឡង សញ្ញាបត្រមធ្យមសិក្សាទុតិយភូមិបាន នៅ មណ្ឌលវិទ្យាល័យ ហ៊ុន សែន វត្តស្វាយ (ខាងជើង) ដោយអង្គុយលើរទេះរុញ និងនៅបន្ទប់ដាច់ដោយឡែកពីគេ ។
ករណីមួយទៀត បេក្ខជនរូបនេះមានអាការៈវិលមុខ ត្រូវបានក្រុមគ្រូពេទ្យពិនិត្យរៀងធូស្រាលបន្តិច រួចប្រធានមណ្ឌលអនុញ្ញាតឱ្យប្រឡងបន្តនៅខាងក្រៅបន្ទប់ក្បែរទីតាំងពេទ្យ ៕
ដោយ ៖ សិលា
