ខេត្តត្បូងឃ្មុំ៖ នាយកដ្ឋាននគរបាលប្រឆាំងបទល្មើសសេដ្ឋកិច្ច នៃក្រសួងមហាផ្ទៃ នៅព្រឹកថ្ងៃទី០៩ ខែតុលា ឆ្នាំ២០២៤នេះ បានឱ្យដឹងថា បារីក្លែងក្លាយចំនួន ២៣មុខ ដែលមានចំនួនសរុបប្រមាណ ៧០តោន ត្រូវបានមន្រ្តីជំនាញដកហូតយកមករក្សាទុក និងដុតកម្ទេចចោល ក្រោយធ្វើការបង្រ្កាបបានកាលពីពេលកន្លងទៅនេះ។
ប្រភពដដែលបន្តថា ក្នុងពិធីនេះ លោកឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច តំណាងដ៏ខ្ពង់ខ្ពស់របស់ លោកនាយឧត្តមសេនីយ៍ អគ្គស្នងការនគរបាលជាតិ កាលពីថ្ងៃទី០៧ ខែតុលា ឆ្នាំ២០២៤ នៅភូមិជ័យនិគម ឃុំកណ្តោលជ្រុំ ស្រុកពញាក្រែក ខេត្តត្បូងឃ្មុំ បានដឹកនាំកម្លាំងជំនាញ សហការជាមួយអយ្យការអមសាលាដំបូងខេត្តត្បូងឃ្មុំ ដោយមានការចូលរួមពីតំណាងនាយកដ្ឋានកណ្តាលសន្តិសុខ ស្នងការនគរបាលខេត្តត្បូងឃ្មុំ សេនានុព័ន្ឋសន្តិសុខមាតុភូមិអមស្ថានទូតសហរដ្ឋអាមេរិកប្រចាំកម្ពុជា អាជ្ញាធរមូលដ្ឋាន រួមនឹងក្រុមហ៊ុនដើមបណ្តឹង។
សូមជម្រាបជូនថា ការរៀបចំពិធីដុតបំផ្លាញចោលនូវសម្ភារវត្ថុតាងបម្រើឱ្យការផលិតបារីក្លែងក្លាយ ចំនួន ២៣មុខ សរុបប្រមាណ ៧០តោន រឹបអូសតាមអំណាចសាលក្រមព្រហ្មទណ្ឌ ដែលបានបង្ក្រាបកាលពីថ្ងៃទី០៨ ខែមិថុនា ឆ្នាំ២០២៣ និងត្រួតពិនិត្យឡើងវិញកាលពីថ្ងៃទី០៧ ខែកុម្ភៈ ឆ្នាំ២០២៤ ទៅលើរោងចក្របារីមួយកន្លែងស្ថិតនៅ ភូមិទន្លេបិទ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ ។
គួរបញ្ជាក់ថា សម្ភារទាំងអស់ត្រូវបានទម្លាក់ចូលក្នុងរណ្តៅទំហំ១០ គុណនិង១០ម៉ែត្រ ជម្រៅ៣ម៉ែត្ររួចចាក់ប្រេងម៉ាស៊ូត ដុតរហូតដល់ឆេះអស់ បន្ទាប់មកកាយដីកប់តាមលក្ខណៈបច្ចេកទេសផងដែរ៕
ដោយ៖តារា
