ខេត្តបន្ទាយមានជ័យៈបុរសម្នាក់នាំប្រពន្ធកូនទៅរាវគ្រុំនៅចំណុចអាងទឹកម្កាក់ ស្ថិតនៅភូមិម្កាក់ សង្កាត់ម្កាក់ ក្រុងសិរីសោភ័ណ កើតខ្យល់គស្លាប់ក្នុងទឹកអាងនៅវេលាម៉ោង៤និង១៥នាទីល្ងាចថ្ងៃទី១១ ខែតុលា ឆ្នាំ ២០២៤ ។
នគរបាលប៉ុស្តិ៍រដ្ឋបាលសង្កាត់ម្កាក់បានឲ្យដឹងថា៖ជនរងគ្រោះឈ្មោះគ្រឿង បានរង ភេទប្រុសអាយុ៤០ឆ្នាំមានទីលំនៅភូមិគោកលៀប សង្កាត់ម្កាក់ ក្រុងសិរីសោភ័ណ ខេត្តបន្ទាយមានជ័យ ។ មុនពេលកើតហេតុជនរងគ្រោះ បាននាំប្រពន្ធនិងកូនប្រុសតូច ទៅរាវគ្រុំនៅក្នុងអាងទឹកម្កាក់ ។
នគរបាលបានបញ្ជាក់ថាៈតាមការរៀបរាប់ពីស្ត្រីជាប្រពន្ធនៅពេលដែលចុះរាវគ្រុំនោះគាត់មិនបានក្បែរគ្នាទេប្តីគាត់នៅរាវជាមួយកូនប្រុសតូច២នាក់ ចំណែកគាត់រាវនៅខាងត្បូងចម្ងាយពីប្តីនិងកូនប្រហែល៣០ម៉ែត្រ ។ លុះក្រោយមកដោយមិនឃើញប្តីក៏បានសួរទៅកូនទាំង២នោះថាឪទៅណាកូនប្រាប់ថាមុចទឹកម៉ែសួរថាមុចយូរនៅហើយនៅកន្លែងណា កូនចង្អុលប្រាប់ក៏ដើរទៅរាវរកឃើញប្តីលង់ទឹក ហើយក៏ស្រង់ប្តីយកមកលើគោកហើយក៏ប្រាប់កូនស្រីទៅប្រាប់នគរបាលប៉ុស្តិ៍ឲ្យជួយតែជាអកុសលប្តីគាត់បានដាច់ខ្យល់ស្លាប់ ៕វណ្ណា
