ភ្នំពេញ៖ បុរសម្នាក់ត្រូវបានម៉ូតូមួយគ្រឿងមិនស្គាល់ម៉ាកបុកបណ្ដាលអោយស្លាប់ រួចក៏សែងសពទៅម្ខាង បន្ទាប់មកក៏ជិះម៉ូតូរត់គេចខ្លួនបាត់ទៅ។ ហេតុការណ៍នេះបានកើតឡើងកាលពីវេលាម៉ោង១០និង២០នាទីយប់ ថ្ងៃទី២០ ខែតុលា ឆ្នាំ២០២៤ ស្ថិតនៅតាមបណ្តោយផ្លូវលេខ៥៩៨ កែងផ្លូវលេខ៣១៧ ត្រង់ចំណុចស្តុបឥន្ទ្រទេវី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុមានបុរសម្នាក់ដើរតាមបណ្តោយផ្លូវលេខ៥៩៨ ក្នុងទិសដៅពីជើងទៅត្បូង លុះដើរទៅដល់ចំណុចភ្លើងស្តុបក៏បានដើរឆ្លងផ្លូវស្រាប់តែមានម៉ូតូ១គ្រឿងមិនស្គាល់ម៉ាកបើកបរតាមបណ្តោយផ្លូវលេខ៣១៧ ក្នុងទិសដៅពីកើតមកលិច ជ្រុលមកបុកបុរសថ្មើរជើងម្នាក់នោះទាំងកំរោល បណ្តាលឱ្យបុរសរងគ្រោះខាងលើសន្លប់ទាំងសភាពបែកក្បាល រួចក៏បានសែងសពទៅដាក់នៅមុខយានដ្ឋានមួយកន្លែង បន្ទាប់មកក៏ជិះម៉ូតូរត់គេចខ្លួនបាត់ស្រមោលទៅ។
បន្ទាប់ពីបុកហើយជិះម៉ូតូរត់រួចមក មានប្រជាពលរដ្ឋនាំគ្នាទៅមើលបុរសរងគ្រោះ ទើបដឹងថាបែកក្បាលស្លាប់ ក៏បង្កការភ្ញាក់ផ្អើលដល់សមត្ថកិច្ចមូលដ្ឋានចុះមកកាន់ទីតាំងកើតហេតុភ្លាមៗ ព្រមទាំងបានធ្វើការព័ទ្ធខ្សែប្រតិបត្តិការណ៍ ដើម្បីធ្វើកោសល្យវិច័យលើសពជនរងគ្រោះផងដែរ។
ក្រោយពេលកើតហេតុ សមត្ថកិច្ចជំនាញ បានធ្វើការទាក់ទងរកក្រុមគ្រួសារសព ដើម្បីមកទទួលសពយកទៅធ្វើបុណ្យតាមប្រពៃណី ព្រមទាំងធ្វើការស្រាវជ្រាវដើម្បីស្វែងរកម៉ូតូនិងជនបង្កនោះមកអនុវត្តតាមនីតិវិធីច្បាប់ ៕
ដោយ ៖ ភារ៉ា ដង្កោ
