ភ្នំពេញ៖ កម្លាំងសមត្ថកិច្ចនគរបាលខណ្ឌជ្រោយចង្វា ឃាត់ខ្លួនជនត្រូវសង្ស័យ៦ជាបន្តបន្ទាប់ ពាក់ព័ន្ធករណីគ្រឿងញៀនដកហូតបានថ្នាំញៀន៦កញ្ចប់ និងម៉ូតូ៣គ្រឿង។

ប្រតិបត្តិការនេះធ្វើឡើងកាលពីយប់ថ្ងៃទី៨ ខែសីហា ឆ្នាំ២០១៦ នៅតាមបណ្ដោយផ្លូវជាតិលេខ៦ ទល់មុខវត្តគៀនឃ្លាំង ភូមិគៀនឃ្លាំង ស្ថិតនៅក្នុងសង្កាត់-ខណ្ឌជ្រោយចង្វា រាជធានីភ្នំពេញ ។

សមត្ថកិច្ចនគរបាលខណ្ឌជ្រោយចង្វាបានឲ្យថា  ជនសង្ស័យដែលឃាត់ខ្លួនខាងលើមានឈ្មោះ ទី១-ឈ្មោះមុំ សុចាន់ អាយុ២២ឆ្នាំ ទី ២-ឈ្មោះយី តុយនុយ ជនត្រូវជាប់សង្ស័យទាំង២នាក់ មានមុខរបរជាងផ្សារដែកដូចគ្នានិងស្នាក់នៅ ផ្លូវជួរ លំ ភូមិបឹងឈូក សង្កាត់ច្រាំងចំរេះ ខណ្ឌឫស្សីកែវ ទី៣-ឈ្មោះកាក់ ភារុន អាយុ២៦ឆ្នាំ មានមុខរបរជាង បាញ់ថ្នាំឡាន ទី៤-ឈ្មោះជឿន សំណាង អាយុ ២៤ឆ្នាំ មានមុខរបរជាងដែក ជនត្រូវជាប់សង្ស័យទាំង២នាក់ ស្នាក់នៅភូមិខ្លែងពណ៍ ឃុំជ្រៃរៀន ស្រុកព្រៃឈរ ខេត្តកំពង់ចាម ទី៥-ឈ្មោះពីន រ៉ាឌី អាយុ២៣ឆ្នាំ មានមុខរបរជាងសំណង់ ទី៦-ឈ្មោះពឹប បូណា អាយុ ២៣ឆ្នាំ មានមុខរបរមិនពិតប្រាកដ ជនត្រូវជាប់សង្ស័យទាំង២នាក់ ស្នាក់នៅភូមិស្វាយស្រណោះ ឃុំរកាអា ស្រុកកងមាស ខេត្តកំពង់ចាម ។

លោក ឯក សេរីវុធ អធិការរងនគរបាលយុត្តិធម៌ខណ្ឌជ្រោយចង្វាបានឲ្យដឹងថា  កម្លាំងនៃអធិការដ្ឋាននគរបាលខណ្ឌជ្រោយចង្វា បានដាក់គោលដៅជាប្រចាំឈរជើងយាមល្បាត ពួនស្ទាក់ដោយសហការនឹងកម្លាំងសមត្ថកិច្ចតាមមូលដ្ឋានប៉ុស្ដិ៍និមួយៗ ដើម្បីបង្ការទប់ស្កាត់រាល់បទល្មើសក្នុងភូមិសាស្ត្រខណ្ឌរបស់ខ្លួន ដើម្បីពង្រឹងលើបញ្ហាសន្តិសុខ ភូមិ-សង្កាត់ មានសុវត្ថិភាព។ ជាក់ស្តែងនៅយប់មិញនេះ កម្លាំងនគរបាលយើងបានបន្តល្បាតទើបប្រទះឃើញ បក្ខពួកមួយក្រុមជិះម៉ូតូ៣គ្រឿង មានគ្នា៦នាក់ ដោយគួរសង្ស័យក៏ឃាត់សួរនាំ ដើម្បីត្រួតពិនិត្យជាបន្តបន្ទាប់ បានរកឃើញក្រាម ពណ៌ថ្លា ជាប្រភេទម៉ាទឹកកក ចំនួន៦កញ្ចប់ដែលក្រុមទាំងនេះ បានរក្សាទុកនូវនឹងខ្លួនត្រៀមយកទៅប្រើប្រាស់រួមគ្នាទើបឈានដល់ការបង្ក្រាបនិងឃាត់ខ្លួនតែម្ដង ព្រមទាំងដកហូតមធ្យោបាយ ធ្វើដំណើរមានម៉ូតូចំនួន៣គ្រឿងផងដែរ ។

បច្ចុប្បន្ន ជនត្រូវសង្ស័យទាំង៦នាក់ រួមជាមួយវត្ថុតាងកំពុងឃាត់ខ្លួនបណ្ដោះ អាសន្ននៅអធិការដ្ឋាននគរបាលខណ្ឌជ្រោយចង្វា ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធី៕

ដោយ៖ ជ្រោយពេជ្រ