ខេត្តស្វាយរៀង៖ ករណីរថយន្តដឹកកម្មការិនីរោងចក្របុកគ្នាពីក្រោយបណ្តាលឲ្យរងរបួសធ្ងន់៥នាក់និងស្រាល២នាក់កាលពីវេលាម៉ោង៦និង៣០នាទីល្ងាចថ្ងៃទី០៩ ខែសីហា ឆ្នាំ២០១៦ នៅលើកំណាត់ផ្លូវជាតិលេខ៣១៦A ស្ថិតនៅភូមិព្រៃគគីរ ឃុំព្រៃគគីរស្រុកចន្ទ្រា ខេត្តស្វាយរៀង។

មូលហេតុគឺបណ្ដាលមកពីរថយន្តម៉ាកហ៊ីយ៉ាន់ដាយ ពាក់ស្លាកលេខ ភ្នំពេញ 3B-7856 បើកបរដោយឈ្មោះ អ៊ុងជាមជួប ភេទប្រុស អាយុ២៧ឆ្នាំ មានទីនៅភូមិដូននយ ឃុំច្រេស ស្រុកចន្រ្ទា បានបើកបុករថយន្តមួយគ្រឿងទៀតម៉ាកហ៊ីយ៉ាន់ដាយ ពាក់ស្លាកលេខ ភ្នំពេញ 3D-6423 បើកបរដោយឈ្មោះ ហាស់ សាតី ភេទប្រុស អាយុ៥៥ឆ្នាំមានទីលំនៅភូមិព្រៃអង្គុញ សង្កាត់ព្រៃអង្គុញ ក្រុងបាវិត។

ប្រភពពីសមត្ថកិច្ចបានឲ្យដឹងថា មុនពេលកើតហេតុគេឃើញរថយន្តមួយគ្រឿងពាក់ស្លាកលេខភ្នំពេញ 3D-6423 ចំណុះ៥តោនដឹកកម្មករកម្មការនីពេញរថយន្តប្រមាណជាង៥០នាក់បើកបរពីទឹសខាងលិចទៅទឹសខាងកើតលុះមកដល់ចំណុចកើតហេតុខាងលើក៏មានរថយន្តម៉ាកហ៊ីយ៉ាន់ដាយ ចំណុះ២តោនកន្លះមួយគ្រឿងពាក់ស្លាកលេខភ្នំពេញ 3B-7856 ដឹកកម្មការនីដូចគ្នាដែលបើកស្របទឹសគ្នាពីលិចទៅកើតដែរដោយមានល្បឿនលឿនក៏ជ្រុលទៅបុករថយន្តពីក្រោយពេញទំហឹងបណ្តាលឲ្យកម្មករកម្មការិនីឈនិងអង្គុយខាងក្រោយ រងរបួសធ្ងន់ស្រាលចំនួន៧នាក់។ហើយភ្លាមៗនោះអ្នកបើកបររថយន្តបង្កឈ្មោះ អ៊ុង ជាមជួប បានគេចខ្លួនបាត់ស្រមោល។

បន្ទាប់មកសមរ្ថកិច្ចក៏បានហៅរថយន្តសាមួយដឹងជនរងគ្រោះបញ្ជូនទៅមន្ទីរពេទ្យស្រុកប្រតិបត្តិជីភូ ដើម្បីសង្គ្រោះ រីឯរថយន្តទាំងពីគ្រឿងសមត្ថកិច្ចបានយកទៅរក្សាទុកនៅអធិការដ្ឋាននគបាលស្រុកចន្រ្ទាដើម្បីដោះស្រាយតាមច្បាប់៕

ដោយ៖ យឹម សុថាន