ភ្នំពេញ៖ ស្រ្តីវ័យចំណាស់ម្នាក់បានរងរបួសធ្ងន់ដោយបែកក្បាលហូរឈាមប្រលាក់ពេញខ្លួន ហើយត្រូវបានសមត្ថកិច្ចមូលដ្ឋានចុះទៅអន្តរគមន៍ភ្លាមៗ ដោយដឹកបញ្ចូនទៅកាន់មន្ទីរពេទ្យ បន្ទាប់ពីមានភ្លៀងធ្លាក់១មេធំ និងលាយឡំដោយខ្យល់កន្ត្រាក់ បណ្ដាលឲ្យបង្គោលភ្លើងមួយដើមបាក់សង្កត់ទៅលើគាត់កំពុងជិះម៉ូតូឌុប។
ហេតុការណ៍នេះកើតឡើងកាលវេលាម៉ោង៣និង៥០នាទីរសៀលថ្ងៃទី១០ ខែសីហា ឆ្នាំ២០១៦ តាមបណ្ដោយផ្លូវ ខណៈមកចំណុចផ្លូវលេខ៦៣ (ផ្លូវត្រសក់ផ្អែម) ក្នុងសង្កាត់ផ្សារថ្មី៣ ខណ្ឌដូនពេញ ។
ស្រី្តរងគ្រោះមានឈ្មោះ ហួន ផល្លី ភេទស្រី អាយុ៥៥ឆ្នាំ ស្នាក់នៅផ្ទះលេខ៣៦ ផ្លូវ ២១៩ សង្កាត់បឹងកក់២ ខណ្ឌទួលគោក រាជធានីភ្នំពេញ។
ប្រភពព័ត៌មានពីកន្លែងកើតហេតុឲ្យដឹងថា នៅមុនពេលកើតហេតុស្រី្តរងគ្រោះបានជិះម៉ូតូឌុប ធ្វើដំណើរតាមបណ្ដោយផ្លូវលេខ៦៣ (ផ្លូវត្រសក់ផ្អែម) ក្នុងសង្កាត់ផ្សារថ្មី៣ ក្នុងទិសដៅពីជើងទៅត្បូង ខណៈមកដល់ចំណុចកើតហេតុបង្គោលភ្លើងចាស់ពុកនោះត្រូវបានខ្យល់បក់បោកខ្លាំងក៏បាក់សង្កត់លើរូបគាត់បែកក្បាល រួចត្រូវបានកម្លាំងនគរបាលបញ្ជូនទៅមន្ទីរពេទ្យភ្លាមៗ។ ចំណែកបង្គោលភ្លើងដែលបាក់នោះត្រូវបានកម្លាំងនគរបាលនាំគ្នាលើកចេញពីកណ្ដាលផ្លូវដើម្បីកុំឲ្យកកស្ទះចរាចរណ៍ជូនប្រជាពលរដ្ឋ ហើយក៏មិនបណ្ដាលឲ្យប៉ះពាល់សល់រថយន្ត និងមនុស្សដទៃទៀតដែរ៕
ដោយ៖ ស ដារ៉ា
