ខ្សែបម្រើអន្តរជាតិបារាំង Paul Pogbaបានផ្លាស់ចេញពីក្រុមសេះបង្កង់ Juventus មកកាន់ក្រុមបិសាចក្រហមដែលជាក្លិបចាស់របស់ខ្លួនក្នុងតម្លៃខ្លួន៨៩លានផោន ។

កីឡាករវ័យ២៣ឆ្នាំនេះបានចាកចេញពីបិសាចក្រហម Manchester United ទៅ កាន់សេះបង្កង់ក្នុងតម្លៃខ្លួនតែ១,២លានផោនប៉ុណ្ណោះកាលពីឆ្នាំ២០១២។ ប៉ុន្តែ ពេលនេះរូបគេបានសម្រេចចិត្តចុះហត្ថលេខាមកលេងឲ្យក្រុមចាស់របស់ខ្លួនរយៈពេល៥ឆ្នាំក្នុងតម្លៃខ្លួនខ្ពស់ជាងគេបំផុតរបស់ ពិភពលោក ។

ក្រោយចុះកិច្ចសន្យារួច Pogba បាន ថ្លែងថា “នេះគឺជាក្លិបដ៏ត្រឹមត្រូវបំផុត សម្រាប់ខ្ញុំដើម្បីជោគជ័យនៅក្នុងអាជីព”។ ចំណែកលោក Jose Mourinho គ្រូ បង្វឹករបស់ក្លិប Man United បាននិយាយ ថា Pogba នឹងក្លាយទៅជាបេះដូងរបស់ក្លិបនៅក្នុងរយៈពេល១០ឆ្នាំខាងមុខទៀត។

គួរបញ្ជាក់ថា តម្លៃនៃការផ្ទេរបស់ Pogba ថ្លៃជាងការផ្ទេររបស់កីឡាករ Gareth Bale ពីក្រុម Tottenham ទៅកាន់ក្លិប Real Madridកាលពីឆ្នាំ២០១៣ដែលមានតម្លៃត្រឹមតែ ៨៥លានផោន ៕

ដោយ៖ ដេវីត