ខេត្តកំពង់ស្ពឺ៖ ស្ត្រីជាប្រពន្ធបានស្លាប់ភ្លាមៗនៅកន្លែងកើតហេតុ និងប្តីបានរងរបួសធ្ងន់ធ្ងរត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យភ្លាមៗខណៈដែលបើកម៉ូតូក្នុងល្បឿនលឿនជ្រុលទៅបុកបង្កាន់ដៃស្ពាន កាលពីម៉ោង១២ និង៣០នាទីថ្ងៃត្រង់ទី១១ ខែសីហា ឆ្នាំ២០១៦ នៅចំណុចស្ពានអូរតូម៉ាទិចលើទំនប់ចាន់ថ្នាល លើផ្លូវជាតិលេខ44•2 ភូមិគោកសណ្តែក ឃុំក្រាំងចេក ស្រុកឧដុង្គ ខេត្តកំពង់ស្ពឺ ។

អ្នកបើកបរម៉ូតូមានឈ្មោះ ម៉ាត់ ធឿន ភេទប្រុស អាយុ៤២ឆ្នាំ រស់នៅភូមិក្រវៀក ឃុំយាអង្គ ស្រុកថ្ពង ខេត្តកំពង់ស្ពឺ បើកបរម៉ូតូម៉ាកហុងដាឌ្រីម សេ១២៥ សេរី២០១២ ពណ៌ខ្មៅ ពាក់ស្លាកលេខកំពង់ស្ពឺ1F-0633 បានធ្វើដំណើរពីជើងទៅត្បូងក្នុងល្បឿនយ៉ាងលឿនមកចំណុចកើតហេតុក៏រេចង្កូតបុកបង្កាន់ដៃស្ពានបណ្តាលឲ្យជាប្ដីរបួសបាក់ជើងឆ្វេង ចំណែកប្រពន្ធជិះពីក្រោយបានបែកក្បាលចេញខួរស្លាប់យ៉ាងអាណោចអាធ័មឈ្មោះ ម៉ែន ម៉េត អាយុ៤០ឆ្នាំ រស់នៅភូមិឃុំជាមួយគ្នា រីឯម៉ូតូខូចខាតស្ទើរទាំងស្រុង ។

ក្រោយកើតហេតុនគរបាលជំនាញចុះធ្វើការវាស់វែងប្រគល់សពឲ្យសាច់ញាតិយកទៅធ្វើបុណ្យតាមប្រពៃណី៕

ដោយ៖ សេនា សក្តិ