ខេត្តព្រៃវែង ៖ អ្វីដែលលោកអ្នកឃើញនេះ(វីដេអូផ្តល់ជូនដោយអ្នកដំណើរ) គឺជាផ្លូវខេត្តលេខ៣១២ ដែលបានសាងសង់ជិតរួចរាល់ហើយ ព្រមទាំងកំពុងគូសគំនូស និងដំឡើងបរិក្ខាសុវត្ថិភាពចរាចរណ៍។ នេះជាលើកឡើងពីលោក ផន រឹម អ្នកនាំពាក្យ និងជា អនុរដ្ឋលេខាធិការ ក្រសួងសាធារណការ និង ដឹកជញ្ជូន នៅព្រឹកថ្ងៃទី៩ ខែធ្នូ ឆ្នាំ២០២៤ ។

លោកបន្តថា ៖ ផ្លូវខេត្តមួយនេះត្រូវបានលើកកម្រិតជួសជុល និងថែទាំឱ្យក្លាយខ្សែជាផ្លូវយុទ្ធសាស្រ្តភ្ជាប់ពីផ្លូវជាតិលេខ១ ទៅច្រកទ្វារព្រំដែនកម្ពុជា-វៀតណាម មានប្រវែង ២៨,៣៧ គ.ម ចាប់ផ្តើមពីភូមិសំរោង ឃុំល្វា (ត្រង់បំបែកផ្លូវជាតិលេខ១ គីឡូម៉ែត្រលេខ ៧៧+០៨២) រហូតដល់ភូមិករគោ ឃុំបន្ទាយចក្រី (ព្រំប្រទល់កម្ពុជា-វៀតណាម) ក្នុងភូមិសាស្រ្តស្រុកព្រះស្តេច នៃខេត្តព្រៃវែង។
លោក ផន រឹម អ្នកនាំពាក្យ និងជា អនុរដ្ឋលេខាធិការ ក្រសួងសាធារណការ និង ដឹកជញ្ជូន បានបញ្ជាក់ថា ៖ គិតត្រឹមបំណាច់ខែវិច្ឆិកា ឆ្នាំ២០២៤ គម្រោងអនុវត្តបាន៩២,១០% និងកាលបរិច្ឆេទបញ្ចប់ការសាងសង់ក្នុងកិច្ចសន្យានៅបំណាចខែធ្នូ ឆ្នាំ២០២៤ខាងមុខនេះហើយ។
គម្រោងនេះ ត្រូវបានស្តារពង្រីកទទឹងតួផ្លូវរហូតដល់ ១២ម៉ែត្រ និងលើកកម្រិតគុណភាព ពីប្រភេទផ្លូវក្រាលកៅស៊ូពីរស្រទាប់(DBST) ទៅជាប្រភេទផ្លូវក្រាលបេតុងកៅស៊ូ (AC) និងផ្នែកខ្លះក្រាលបេតុងសរសៃដែកកម្រាស់ ២៥ស.ម ដែលមានទទឹងរួម ១១ម៉ែត្រ និងមាន២គន្លងទៅ-មក៕

ដោយ ៖ សិលា