ភ្នំពេញ៖ បុរសម្នាក់បានបើករថយន្តម៉ាកកាមរីហាយប្រ៊ីដក្នុងស្ថានភាពស្រវឹងក៏រេចង្កូតឡើងលើចិញ្ចើមផ្លូវទៅបុកស្លាកសញ្ញាចរាចរណ៍ហើយបន្តទៅបុកដើមឈើធ្នង់ បណ្ដាលឱ្យរថយន្តរងការខូចខាតយ៉ាងដំណំ ។
ហេតុការណ៍នេះបានកើតឡេីងនៅវេលាម៉ោង ៥និង២០នាទីទៀបភ្លឺថ្ងៃទី២៥ខែធ្នូឆ្នាំ២០២៤ នៅទល់មុខរដ្ឋសភា តាមបណ្ដោយផ្លូវរដ្ឋសភា សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់ដែលមិនដឹងជាចេញពីកម្មវិធីហូបចុកនៅទីណានោះទេបានបើករថយន្តម៉ាកកាមរីហាយប្រ៊ីដ ពណ៌ស ពាក់ស្លាកលេខ ភ្នំពេញ2AS-0891 ធ្វើដំណើរតាមផ្លូវរដ្ឋសភាក្នុងទិសដៅពីត្បូងទៅជើងដោយល្បឿនលឿន ហើយពេលមកដល់ចំណុចកើតហេតុស្រាប់តែរថយន្តរេចង្កូតឡើងលើចិញ្ចើមផ្លូវទៅបុកបង្គោលស្លាកសញ្ញាចរាចរណ៍បាត់អស់មួយដើមហើយរថយន្តក៏បន្តទៅបុកជាមួយនឹងដើមធ្នង់ដែលដាំនៅមុខរដ្ឋសភាធ្វើឱ្យរថយន្តរងការខូចខាតផ្នែកខាងមុខចំហៀងខាងស្តាំទៅមុខលែងរួច ។
ក្នុងហេតុការណ៍នេះគឺមិនមានមនុស្សរងរបួសទេ តែអ្នកបើកបរស្ថិតក្នុងស្ថានភាពស្រវឹង ត្រូវសមត្ថកិច្ចឃាត់យកទៅប្រគល់អោយផ្នែកជំនាញចរាចរណ៍។
ក្រោយកើតហេតុសមត្ថកិច្ចចុះមកកន្លែងកើតហេតុពិនិត្យឃើញថាមានការខូចខាតបាក់ស្លាកសញ្ញាចរាចរណ៍អស់មួយដើមក៏ដូចជាដែកដែលជ្រែងដើមឈើ បានបាក់ចំនួន១ដើម ដូច្នេះហើយក៏ប្រគល់រថយន្តឲ្យជំនាញចរាចរណ៍ផ្លូវគោកស្ទូចយកទៅរក្សាទុករង់ចាំដោះស្រាយនាពេលក្រោយ ៕
ដោយ៖សុខាសែនជ័យ
