ភ្នំពេញ៖ ដើម្បីទប់ស្កាត់ និងការកាត់បន្ថយគ្រោះថ្នាក់ចរាចរណ៍ណាមួយជាយថាហេតុ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដាក់បញ្ជាឱ្យមន្រ្តីជំនាញចរាចរណ៍ ចុះទៅសិក្សាអំពីស្ថានភាពចរាចរណ៍នៅផ្លូវ៦០ម៉ែត្រ បន្ទាប់ពីមានករណីគ្រោះថ្នាក់ចរាចរណ៍ស្ទើររៀងរាល់ថ្ងៃ បណ្ដាលឱ្យមនុស្សស្លាប់ និងរងរបួសធ្ងន់ស្រាលនៅតាមបណ្ដោយផ្លូវមួយនេះ។
ជាក់ស្ដែងយោងតាមប្រភពព័ត៌មានពីស្នងការដ្ឋាននគរបាលរាជធានីភ្នំពេញ បានឱ្យដឹងថា ក្នុងធ្វើកិច្ចសម្ភាសន៍ជាមួយសារព័ត៌មានក្នុងស្រុក នារសៀលថ្ងៃទី២០ ខែមករានេះ លោកឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ បានបញ្ជាលោកស្នងការរងស្តីទីផែនការងារនគរបាលចរាចរណ៍ និងលោកនាយការិយាល័យនគរបាលចរាចរណ៍ផ្លូវគោក ដឹកនាំមន្រ្តីជំនាញចុះទៅសិក្សាអំពីស្ថានភាពចរាចរណ៍នៅផ្លូវ៦០ម៉ែត្រ និងពិនិត្យបញ្ហាប្រឈមដែលកើតមានបញ្ហាគ្រោះថ្នាក់ចរាចរណ៍នៅលើផ្លូវ៦០ម៉ែត្រនេះ ។
ជាមួយគ្នានេះដើម្បីកាត់បន្ថយបញ្ហាគ្រោះថ្នាក់ចរាចរណ៍ លោកឧត្តមសេនីយ៍ស្នងការ បានបញ្ជាឲ្យជំនាញចាប់ផ្តើមបាញ់ល្បឿន ផាកពិន័យចំពោះអ្នកបើកបរលើសល្បឿនកំណត់៦០Km/១h ដោយអនុវត្តចាប់ពីថ្ងៃទី២១ ខែមករា ឆ្នាំ២០២៥តទៅ។
ជាមួយគ្នានេះ លោកឧត្តមសេនីយ៍ឯក ស្នងការ ក៏សូមអំពាវនាវប្រជាពលរដ្ឋចូលរួមគោរពច្បាប់ចរាចរណ៍ផ្លូវគោកដើម្បីបញ្ចៀសបញ្ហាគ្រោះថ្នាក់ចរាចរណ៍៕ដោយ៖ស តារា
