ភ្នំពេញ ៖ ជនសង្ស័យម្នាក់ ឆក់ទូរស័ព្ទ ពីយុវជន ជាអ្នកលក់ចំណីត្រីបាន២ថ្ងៃ ត្រូវបានសមត្ថកិច្ច ខណ្ឌឫស្សីកែវ តាមស្រាវជ្រាវឃាត់ខ្លួន កាលពីយប់ថ្ងៃទី២៣ ខែមករា ឆ្នាំ២០២៥ នៅចំណុចផ្លូវបេតុង ភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ។

លោក ហ៊ាង ថារ៉េត អធិការខណ្ឌឫស្សីកែវ បានអោយដឹងថា ៖ ជនរងគ្រោះឈ្មោះ ហួរ គឹមអូន អាយុ១៨ឆ្នាំ មុខរបរលក់ចំណីត្រី មានទីលំនៅភូមិទួលថ្ងាន់ សង្កាត់ទួលសង្កែ២ ខណ្ឌឫស្សីកែវ។ ចំណែកជនសង្ស័យឈ្មោះ ធាវី ផាត់យុត អាយុ២២ឆ្នាំ មានទីលំនៅផ្ទះលេខ៨៩ ភូមិស្ពានខ្ពស់ សង្កាត់គម៦ ខណ្ឌឫស្សីកែវ រាជធានីភ្នំពេញ (ឃាត់ខ្លួន មានសារធាតុញៀន)។

សម្ភារៈដកហូត៖ ១- ម៉ូតូមួយគ្រឿងម៉ាក Honda Scoopy ពណ៌ខ្មៅ ពាក់ផ្លាកលេខ ភ្នំពេញ 1KY-0982 (មធ្យោបាយធ្វើសកម្មភាព)
២- ទូរស័ព្ទមួយគ្រឿងម៉ាក Oppo A55 ពណ៌ខ្មៅ (ជារបស់ជនរងគ្រោះ)។

លោក ហ៊ាង ថារ៉េត អធិការខណ្ឌឫស្សីកែវ បន្តថា ៖ កាលពីព្រលប់ថ្ងៃទី២១ ខែមករា ឆ្នាំ២០២៥ ជនរងគ្រោះ កំពុងជិះកង់លក់ចំណីត្រី ពេលមកដល់ចំណុចកើតហេតុស្រាប់តែមានជនសង្ស័យម្នាក់ជិះម៉ូតូមួយគ្រឿងម៉ាក Honda Scoopy ពណ៌ខ្មៅ មកធ្វើជាទិញចំណីត្រីពីជនរងគ្រោះ បន្ទាប់មកជនសង្ស័យបានសុំខ្ចីទូរស័ព្ទរបស់ជនរងគ្រោះ ថាទាក់ទងទៅបងសួរថាទិញចំណីត្រីប៉ុន្មាន ភ្លាមនោះជនរងគ្រោះបានដកទូរស័ព្ទចេញមកហើយអោយជនសង្ស័យហៅលេខទូរស័ព្ទ ស្រាប់តែជនសង្ស័យបានធ្វើសកម្មភាពឆក់យកទូរស័ព្ទរបស់ជនរងគ្រោះរួចជិះម៉ូតូគេចខ្លួនបាត់។ ក្រោយកើតហេតុជនរងគ្រោះបានមកដាក់ពាក្យបណ្តឹងនៅប៉ុស្តិ៍ឫស្សីកែវ បន្ទាប់មកកម្លាំងជំនាញខណ្ឌប៉ុស្តិ៍បានបើកការស្រាវជ្រាវកំណត់អត្តសញ្ញាណរបស់ជនសង្ស័យ ចុះទៅឃាត់បានជនសង្ស័យ រួមនឹងវត្ថុតាងខាងលើ នាំមកកាន់ប៉ុស្តិ៍ឫស្សីកែវ និងបាន កសាងសំណុំរឿងបញ្ចូនទៅសាលាដំបូងរាជធានីភ្នំពេញ ចាត់ការតាមច្បាប់៕

ដោយ៖ ជ្រោយពេជ្រ