ខេត្តព្រះសីហនុ÷នាវាទេសចរណ៍បរទេសចំនួន១គ្រឿងមានឈ្មោះ CRYSTAL SYMPHONY បាននាំភ្ញៀវទេសចរបរទេសចម្រុះជាតិសាសន៍ជិត៥០០នាក់ ស្មើ នឹង២៨សញ្ជាតិ បានចូលសុំចតធ្វើទស្សនកិច្ចនៅព្រះនរាជាណាចក្រកម្ពុជារយៈពេល១ថ្ងៃ តាមច្រកកំពង់ផែស្វយ័តក្រុងព្រះសីហនុ ប្រកបដោយសុវត្ថិភាព នាព្រឹកថ្ងៃសុក្រ ទី២៤ ខែមករា ឆ្នាំ២០២៥។

តាមការឱ្យដឹងពីមន្ត្រីនគរបាលអន្តោប្រវេសន៍ច្រកទ្វារអន្តរជាតិកំពង់ផែស្វយ័តក្រុងព្រះសីហនុ បានឱ្យដឹងថា នៅព្រឹកថ្ងៃសុក្រ ទី២៤ ខែមករា ឆ្នាំ២០២៥នេះ នាវាទេសចរណ៍បរទេស ១គ្រឿង មានឈ្មោះ CRYSTAL SYMPHONY មានសញ្ជាតិ BAHAMAS មានបណ្តោយ ២៣៨.០១ម៉ែត្រ ទទឹង៣០.២០ម៉ែត្រ ជម្រៅទឹក៧,៦ម៉ែត្រ បាននាំភ្ញៀវទេសចរចម្រុះជាតិសាសន៍ចំនួន៤២៧នាក់ ស្រី២១២នាក់ ស្មើនឹង២៨សញ្ជាតិ និងមាននាវិកសរុបចំនួន៤៨៧នាក់ ស្រី១២០នាក់ ស្មើនឹង៤៨សញ្ជាតិ។ 

នាវាទេសចរណ៍ CRYSTAL SYMPHONY បានធ្វើ ដំណើរចាកចេញពីប្រទេសថៃចូលសំចតនៅកំពង់ផែស្វយ័តក្រុងព្រះសីហនុ កាលពីវេលាម៉ោង៩ ព្រឹកថ្ងៃទី ២៤ ខែមករា ឆ្នាំ២០២៥ នាវានេះមានគម្រោងចាកចេញពីកំពង់ផែស្វយ័តក្រុងព្រះសីហនុ នៅវេលាម៉ោង១៩ និង៣០នាទី ថ្ងៃដដែលឆ្ពោះទៅកាន់កំពង់ផែប្រទេសវៀតណាម។

ភ្ញៀវទេសចរដែលធ្វើដំណើរតាមនាវាទេសចរណ៍បរទេស CRYSTAL SYMPHONY មានសញ្ជាតិច្រើនជាងគេមានដូចជា USA ២៧៤នាក់ ក្រៅពីនោះមានភ្ញៀវទេសចរសញ្ជាតិផ្សេងៗទៀត។ ក្នុងចំណោមភ្ញៀវទេសចរបរទេសជិត៥០០នាគ់ មានភ្ញៀវទេសចរចុះពីនាវា ចូលក្នុងប្រទេសកម្ពុជា ចេញទៅកម្សាន្តនៅអង្គរ ខេត្តសៀមរាបចំនួន ២៦នាក់ ស្រី ១៥នាក់ ស្មើនឹង ៣សញ្ជាតិ។ ទន្ទឹមនោះភ្ញៀវទេសចរបរទេសធ្វើដំណើរតាមឡានក្រុង កម្សាន្តក្នុងខេត្តព្រះសីហនុ មានដូចជា ភូមិនេសាទទំនប់រលក សង្កាត់លេខ១ ទីប្រជុំជនផ្សារលើ តំបន់មាត់សមុទ្រ រូបសំណាកតោពីរ តំបន់វប្បធម៌មានដូចជា វត្តឥន្ទញ្ញាណ វត្តជោតញ្ញាណ ក្នុងក្រុងព្រះសីហនុ។ ទៅកម្សាន្តតំបន់អភិឌ្ឍ Boy of light រូបសំណាកព្រះថោងនាងនាគ មជ្ឈមណ្ឌលវិបស្សនាធុរៈគិរីនាគវ័ន (វត្តសមាធិ) ឃុំរាម ស្រុកព្រៃនប់។

ក្នុងដំណើរកម្សាន្តរបស់ភ្ញៀវទេសចរនៅខេត្តព្រះសីហនុ ដោយទទួលស្វាគមន៍ពីរដ្ឋបាលខេត្តព្រះសីហនុ នៅកំពង់ផែស្វយ័តក្រុងព្រះសីហនុព្រមទាំងមានការសម្រប សម្រួលការពារសន្តិសុខ សុវត្ថិភាពសាធារណៈពីកង កម្លាំងសមត្ថកិច្ច អាជ្ញាធរក្រុង និងអាជ្ញាធរខេត្តព្រះសីហនុ ប្រកបដោយសុវត្ថិភាពផងដែរ៕