នាយករដ្ឋមន្ត្រីឥណ្ឌាលោក ណារិនដ្រា មូឌី បានចោទប្រកាន់ទៅលើប្រទេសប៉ាគីស្ថាន ជាអ្នកបង្ករឲ្យមានអំពើហិង្សាកើតឡើងនៅតំបន់កាស្មៀរ គ្រប់គ្រងដោយឥណ្ឌា ក្នុងពេលឥណ្ឌាប្រារពបុណ្យឯករាជ្យជាតិ។ អំពើហឹង្សានោះបណ្តាលឲ្យមានមនុស្សស្លាប់យ៉ាងហោចណាស់៩នាក់ នៅក្នុងការប៉ះទង្គិចហិង្សាជាច្រើនកន្លែងនៅតំបន់កាស្មៀ។

នេះគឺជាលើកទីមួយហើយ ដែលនាយករដ្ឋមន្ត្រីឥណ្ឌា បានលើកឡើងអំពីវិបត្តិនៅតំបន់ភាគនិរតី ប៉ាគីស្ថាន ដើម្បីវាយប្រហារនិងរិះគន់ប្រទេសជិតខាងជាអតីតគូសត្រូវនឹងគ្នានោះ។ ពោលគឺខុសពីទម្លាប់មុនៗ ដែលលោកតែងកាយកប់ដោយខិតខំបង្ហាញតែភាពជិតស្និទ្ធ ប្រកាន់យកជំហរបើកចំហរទទួលស្វាគមន៍ និងហ៊ានដល់ទៅឆ្លៀតបំពេញទស្សនកិច្ចប្រមុខដឹកនាំ ប៉ាគីស្ថានដល់ផ្ទះផង។ នៅពេលថ្លែងសារជាប្រពៃណីទៅកាន់ពលរដ្ឋក្នុងថ្ងៃបុណ្យជាតិ លោកនាយករដ្ឋមន្ត្រីឥណ្ឌា បានរាលដាលវាយប្រហាររិះគន់ប៉ាគីស្ថាន ថា បានរំលោភសិទ្ធិមនុស្សក្នុងតំបន់ដែលមានចលនាប៉ះបោរចង់ផ្តាច់ទឹកដី Baloutchistan។ ជាប្រសាសន៍ដែលបង្ហាញពីរបត់ថ្មីនៃនយោបាយសង្គ្រាមការទូត ឥណ្ឌា-ប៉ាគីស្ថានផង និងការវាយបកទៅលើក្រុងអ៊ិស្លាម៉ាបាត ដែលបានចោទប្រកាន់ឥណ្ឌា ដូចគ្នាថា រំលោភសិទ្ធិមនុស្សនៅតំបន់ជាប់ជម្លោះកាស្មៀរ។

តំបន់កាស្មៀរ បានធ្លាក់ក្នុងអំពើហិង្សាជាថ្មីឡើងវិញ នារយៈប៉ុន្មានអាទិត្យចុងក្រោយនេះ។ គិតចាប់ពីខែកក្កដា មក ជនស៊ីវិលជាង ៦០នាក់បានស្លាប់ នៅក្នុងការបង្ក្រាបបាតុករយ៉ាងហិង្សាពីសំណាក់ប៉ូលិស។ ហើយនៅថ្ងៃម្សិលមិញនេះទៀត ការប៉ះទង្គិចជាមួយយោធា និងបាតុករ បានធ្វើឲ្យមនុស្ស ៩នាក់ស្លាប់ ក្នុងនោះម្នាក់ជាក្មេងជំទង់ផង។ ប្រព័ន្ធអ៊ីនធ័រណែត ទូរស័ព្ទដៃ ត្រូវបិទខ្ទប់ ប៉ូលិសឥណ្ឌារាប់ពាន់នាក់ ត្រូវបានដាក់ពង្រាយ ដើម្បីការពារសណ្តាប់ធ្នាប់ ព្រោះត្រូវនឹងថ្ងៃបុណ្យឯករាជ្យជាតិផង។

បន្ទាប់មក ការប៉ះទង្គិចក៏បានរាលដាលទៅដល់តំបន់ជាប់ជម្លោះជាមួយប៉ាគីស្ថាន ពីសំណាក់ពួកឧទ្ទាម (ប៉ាគីស្ថាន) ដែលឆ្លងបន្ទាប់ព្រំដែនវាយឆ្មក់ ធ្វើឲ្យមេបញ្ជាការឥណ្ឌាម្នាក់ស្លាប់ ។ ខាងប៉ាគីស្ថានមានស្លាប់ប្រាំនាក់ បើទោះបីជាបម្រាមគោចរក៏ដោយ។ ឥណ្ឌានិងប៉ាគីស្ថាន ឈ្លោះគ្នាព្រោះតំបន់កាស្មៀរ តាំងពីឆ្នាំ១៩៤៧ មក ទាមទារគ្រប់គ្រងបូរណភាពដែនដីភ្នំនេះ។ ពួកឧទ្ទាមតែងប្រយុទ្ធជាមួយទាហ៊ានឥណ្ឌាដើម្បីទាមទារឯករាជ្យ ឬ ដើម្បីបានងាកទៅស្និទ្ធនឹងប៉ាគីស្ថាន៕

ប្រែសម្រួល៖ ម៉ែវ សាធី