ខេត្តកណ្ដាល៖ លោល ប៉ុញ សច្ចៈ រដ្ឋលេខាធិការ និងជាប្រធានក្រុមសម្របសម្រួលការងារធនធានទឹក និងឧតុនិយម ខេត្តកណ្តាល ក្នុងនាមតំណាងលោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អមដំណើរដោយលោក ជួន ប៊ិតថុល អនុប្រធានក្រុមការងារ លោក ប្រាក់ ឡាក់ ប្រធានមន្ទីរធនធានទឹក និងឧតុនិយមខេត្តកណ្តាល ព្រមទាំងអាជ្ញាធរមូលដ្ឋាន នៅព្រឹកថ្ងៃពុធ ៨កើត ខែមាឃ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៥ ខែកុម្ភៈ ឆ្នាំ២០២៥ បានអញ្ជើញចុះពិនិត្យការងារបូមទឹកអន្តរាគមន៍ជួយសង្រ្គោះស្រូវប្រាំងរបស់បងប្អូនប្រជាកសិករ ក្នុងភូមិសាស្ត្រស្រុកពញាឮ និងស្រុកមុខកំពូល ខេត្តកណ្តាល។
ក្នុងឱកាសនោះ លោករដ្ឋលេខាធិការ និងក្រុមការងារ បានអញ្ជើញចុះពិនិត្យវឌ្ឍនភាពជាក់ស្តែងការងារអន្តរាគមន៍នៅតាមឃុំចំនួន៤ នៃស្រុកចំនួន ពីរ គឺ៖ ស្រុកពញាឮ និងស្រុកមុខកំពូល។
លោករដ្ឋលេខាធិការ បានបញ្ជាក់ឱ្យដឹងថា នៅស្រុកពញាឮ ក្នុងឃុំភ្នំបាត ចំណុចកំពង់រាំង លទ្ធផលបូមទឹកសង្គ្រោះសម្រេចបាន៨០% នៃផ្ទៃដីស្រូវប្រាំងសរុប ៥០ហិកតា និងឃុំកំពង់អុស ចំណុចកំពង់រលីញ លទ្ធផលបូមទឹកសង្រ្គោះបានចំនួន ៧០%លើផ្ទៃដីស្រូវប្រាំងសរុប ៩៤ហិកតា និងចំណុចតាត្រៃ លទ្ធផលបូមទឹកជួយសង្រ្គោះបាន ៩០% លើផ្ទៃដីស្រូវប្រាំងសរុប ១១៦ហិកតា។
ចំណែកនៅស្រុកមុខកំពូល ក្នុងឃុំរកាកោងទី១ នៅចំណុចព្រែកផ្តៅ លទ្ធផលបូមទឹកសង្រ្គោះសម្រេចបាន ៥០%លើផ្ទៃដីស្រូវប្រាំងសរុប ១២០ហិកតា និង ឃុំរកាកោង២ នៅចំណុចត្រាំសសរ លទ្ធផលបូមទឹកជួយសង្រ្គោះសម្រេចបាន ៥០% លើផ្ទៃដីស្រូវប្រាំងសរុប ១៨០ហិកតា៕
ដោយ៖តារា
