តាមប្រព័ន្ធផ្សព្វផ្សាយរដ្ឋកូរ៉េខាងជើង នៅ ថ្ងៃទី 18 ខែកុម្ភៈ បានផ្សាយថា ទីក្រុងព្យុងយ៉ាងបានប្តេជ្ញាបន្តពង្រឹងសមត្ថភាពនុយក្លេអ៊ែររបស់ខ្លួន ខណៈដែលបានថ្កោលទោសសហរដ្ឋអាមេរិកចំពោះការបន្តផែនការរំសាយអាវុធនុយក្លេអ៊ែរដែលទីក្រុងព្យុងយ៉ាងហៅថា “ជាការដើរថយក្រោយនិងមិនសមហេតុផល” ។
ក្រសួងការបរទេសកូរ៉េខាងជើងបានធ្វើសេចក្តីថ្លែងការណ៍ជាការឆ្លើយតបទៅនឹងសេចក្តីថ្លែងការណ៍រួមនាពេលថ្មីៗនេះរបស់កូរ៉េខាងត្បូង សហរដ្ឋអាមេរិក និងជប៉ុន ដែលក្នុងនោះប្រទេសទាំងបីបានបញ្ជាក់សាជាថ្មីអំពីគោលដៅរបស់ពួកគេក្នុងការលុបបំបាត់នុយក្លេអ៊ែរទាំងស្រុងនៅឧបទ្វីបកូរ៉េ។
ទីភ្នាក់ងារសារព័ត៌មានមជ្ឈិមកូរ៉េ (KCNA) បានដកស្រង់សេចក្តីថ្លែងការណ៍របស់ក្រសួងការបរទេសរបស់ប្រទេសដែលបញ្ជាក់ថា កូរ៉េខាងជើងនឹងបន្តអនុវត្តយុទ្ធសាស្ត្រថ្មី ដើម្បីពង្រឹងកម្លាំងនុយក្លេអ៊ែររបស់ខ្លួន និងរារាំងរាល់ការគំរាមកំហែង និងការបង្ខិតបង្ខំពីសហរដ្ឋអាមេរិក និងសម្ព័ន្ធមិត្តដោយប្រើឧបករណ៍នយោបាយ និងយោធាដែលមានទាំងអស់។
KCNA បានដកស្រង់សម្តីក្រសួងការបរទេសកូរ៉េខាងជើងថា “សហរដ្ឋអាមេរិកនៅតែបន្តអនុវត្តផែនការរំសាយអាវុធនុយក្លេអ៊ែរហួសសម័យ និងមិនសមហេតុផល ដែលវាកាន់តែមិនអាចទៅរួចទេទាំងក្នុងទ្រឹស្តី និងក្នុងការអនុវត្តក្នុងកាលៈទេសៈបច្ចុប្បន្ន” ។
សេចក្តីថ្លែងការណ៍ក៏បានរិះគន់ការរំសាយអាវុធនុយក្លេអ៊ែរថាជាគោលដៅដែលមើលឃើញខ្លី ហើយបានពណ៌នាថា វាជាកម្ពស់នៃភាពមិនសមហេតុផល ដែលធ្វើឱ្យពិភពលោកភ្ញាក់ផ្អើល។ ក្រុងព្យុងយ៉ាងទទូចថា ក្រុងវ៉ាស៊ីនតោនមិនទាន់ភ្ញាក់ពីដំណេកដែលបរាជ័យក្នុងការរំសាយអាវុធនុយក្លេអ៊ែរនៅឡើយទេ។
ក្រសួងការបរទេសកូរ៉េខាងជើងបានសង្កត់ធ្ងន់ថា “យើងមិនចាំបាច់ពិចារណាពីជំហររបស់អាមេរិកដែលឃ្លាតឆ្ងាយពីការពិតនោះទេ។ យើងថ្កោលទោស និងបដិសេធក្នុងលក្ខខណ្ឌដ៏ខ្លាំងក្លាបំផុត” ។
កាលពីសប្តាហ៍មុន ក្រសួងការបរទេសកូរ៉េខាងត្បូងបាននិយាយថា កិច្ចប្រជុំត្រីភាគីរវាងរដ្ឋមន្ត្រីការបរទេសកូរ៉េខាងត្បូង លោក Cho Tae-yul រដ្ឋមន្ត្រីការបរទេសអាមេរិក Marco Rubio និងរដ្ឋមន្ត្រីការបរទេសជប៉ុន Takeshi Iwaya បានផ្ញើការព្រមានយ៉ាងខ្លាំងដល់កូរ៉េខាងជើង និងបញ្ជាក់ជាថ្មីនូវការប្តេជ្ញាចិត្តក្នុងការពង្រឹងទណ្ឌកម្មអន្តរជាតិប្រឆាំងនឹងទីក្រុងព្យុងយ៉ាង៕ ដោយធីរីណា
រូបថត: KCNA
