ភ្នំពេញ ៖ មន្ត្រីកងអង្គរក្សម្នាក់បានយកកាំបិតកាប់ទៅលេីប្រពន្ធរបស់ខ្លួនជាច្រេីនកាំបិតបណ្ដាលឲ្យស្លាប់ក្នុងថ្លុកឈាមកាលពីថ្ងៃទី១៩ ខែកុម្ភៈ ឆ្នាំ២០២៥ វេលាម៉ោង០១និង៥០នាទីរំលងអធ្រាត្រ ត្រង់ចំណុចផ្ទះគ្មានលេខ ផ្លូវបេតុង ស្ថិតនៅភូមិក្រាំងស្វាយ សង្កាត់ក្រាំងពង្រ ខណ្ឌដង្កោ រាជធានីភ្នំពេញ ហើយពេលបង្កហេតុរួច ជនដៃដល់ក៏បានរត់បាត់ស្រមោល ។
ជនសង្ស័យឈ្មោះ ឈឹម បញ្ញាពិទូរ្យ ភេទប្រុស អាយុ៤៣ឆ្នាំ ជនជាតិខ្មែរ មុខរបរកងអង្គរក្ស មានទីលំនៅភូមិក្រាំងស្វាយ សង្កាត់ក្រាំងពង្រ ខណ្ឌដង្កោ រាជធានីភ្នំពេញ មានស្រុកកំណើតនៅភូមិ កំពង់ចិន ឃុំកំពង់ចិន ស្រុកស្ទោងខេត្តកំពង់ធំ  (រត់គេចខ្លួន) មានសាវតារជាតិគ្រប់គ្រាន់ ។ ចំណែកសពជនរងគ្រោះឈ្មោះ ម៉ុង ស្រីនាង ភេទស្រីអាយុ៤៣ឆ្នាំ ជនជាតិខ្មែរ មុខរបរនៅផ្ទះ មានទីលំនៅភូមិក្រាំងស្វាយ សង្កាត់ក្រាំងពង្រ ខណ្ឌដង្កោ រាជធានីភ្នំពេញ (សពតម្កល់នៅផ្ទះលេខ៦១៧ ផ្លូវបេតុង ភូមិត្រពាំងចក សង្កាត់ព្រៃវែង ខណ្ឌដង្កោ រាជធានីភ្នំពេញ ជាផ្ទះរបស់ឪពុកបង្កើត)។

តាមសាច់ញាតិក្រុមគ្រួសារជនរងគ្រោះបានឲ្យដឹងថា រយៈកាលកន្លងមកជនរងគ្រោះ និងជនសង្ស័យជាប្តី ឧស្សាហ៍ឈ្លោះប្រកែកគ្នា បញ្ហាភ្លើងប្រច័ណ្ឌ និងទំនាស់គ្នាបញ្ហាលុយកាក់ ក្នុងការពុះដីឡូត៍លក់ និងសង់ផ្ទះល្វែងលក់ ដោយមូលហេតុបង្វិលលុយមិនទាន់។
លុះមកដល់ថ្ងៃទី១៩ ខែកុម្ភៈ ឆ្នាំ២០២៥ វេលាម៉ោង០១និង៥០នាទី រំលងអធ្រាត្រ ជនរងគ្រោះ និងជនសង្ស័យជាប្តីបានឈ្លោះប្រកែកគ្នានៅក្នុងបន្ទប់ដេក ពេលនោះឈ្មោះ ម៉ុង ប៉ោហេង ភេទប្រុស អាយុ៣៥ឆ្នាំ ជាប្អូនប្រុសបង្កើតរបស់ជនរងគ្រោះ ឮសំឡេងឈ្មោះប្រកែកគ្នា ក៏គោះទ្វារ អោយបើក តែបងស្រីមិនបើក ហើយក៏ដើរត្រឡប់ទៅផ្ទះរបស់ខ្លួនវិញ  ដែលមានចម្ងាយប្រហែល១៥ម៉ែត្រពីផ្ទះកើតហេតុ។ ក្រោយមកខ្លួនក៏បានក្រឡេកឃើញរថយន្ត(មិនចាំម៉ាក ក្នុងស្ថានភាពងងឹត) ចតនៅលើផ្លូវបេតុងក្រៅរបង  មុខផ្ទះកើតហេតុ ពេលនោះឃើញឈ្មោះ ចឹក សូយ ភេទប្រុស អាយុប្រហែល៣៥ឆ្នាំ ត្រូវជាប្អូនប្រុសបង្កើតរបស់ជនសង្ស័យ បានគ្រាហ៍បងប្រុសបង្កើតរបស់ខ្លួនចេញពីផ្ទះកើតហេតុ ឡើងជិះរថយន្ត ដែលចត់ទុកនៅខាងក្រៅរួចជាស្រេច ជិះគេចខ្លួនបាត់។ បន្ទាប់មកឈ្មោះ ម៉ុង ប៉ោហេង ដោយមានការសង្ស័យក៏បានដើរទៅបន្ទប់ដេករបស់បងស្រី បើកទ្វារចូល ឃើញបងស្រីដេកនៅលើគ្រែពូកក្នុងថ្លុកឈាម ដោយមានស្លាកស្នាម ខាងក្រោមត្រចៀកខាងស្តាំ ០២ កន្លែង, លើថ្ងាស០១កន្លែង, លើក្បាលផ្នែកខាងឆ្វេង០២កន្លែង និងចាក់កញ្ចឹងកខាងឆ្វេង០១កន្លែង ខ្លួនក៏យករថយន្តផ្ទាល់ខ្លួន ម៉ាក ហ៊ីយ៉ាន់ដាយ ពណ៌ទឹកប្រាក់ ពាក់ផ្លាកលេខភ្នំពេញ 2W-2256  ដឹកបងស្រីទៅកាន់មន្ទីរពេទ្យរ៉ូយ៉ាល់ភ្នំពេញ ពេលទៅដល់ក្រុមគ្រូពេទ្យបានពិនិត្យជីពចរនៅលើរថយន្ត ហើយប្រាប់ថា ជនរងគ្រោះបានដាច់ខ្យល់ស្លាប់មុនពេលមកដល់មន្ទីរពេទ្យ។ ដោយសារតែមិនអស់ចិត្តក៏បន្តដឹកទៅកាន់មន្ទីរពេទ្យកាល់ម៉ែត ក្រុមគ្រូពេទ្យបានពិនិត្យជីពចរ ហើយប្រាប់ថា ជនរងគ្រោះបានស្លាប់បាត់ហើយ ។ បន្ទាប់មកឈ្មោះ ម៉ុង ប៉ោហេង ក៏បានដឹកសាកសពបងស្រីបង្កើតមកតម្កល់នៅផ្ទះលេខ៦១៧ ផ្លូវបេតុង ភូមិត្រពាំងចក សង្កាត់ព្រៃវែង ខណ្ឌដង្កោ រាជធានីភ្នំពេញ (ជាផ្ទះរបស់ឪពុកបង្កើត)។
យោងតាមការសន្និដ្ឋាន និងវាយតម្លៃ របស់ការិយាល័យបច្ចេកទេស និងវិទ្យាសាស្ត្រ និងវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យ អមសាលាដំបូងរាជធានីភ្នំពេញ បានសន្និដ្ឋានថា ជនរងគ្រោះស្លាប់ដោយសារអំពើ ឃាតកម្ម កាប់សម្លាប់ពិតប្រាកដមែន ៕

ដោយ ៖ ភារ៉ា ដង្កោ