ភ្នំពេញ៖ ហេតុការណ៍គ្រោះអគ្គិភ័យមួយខណៈដែលម៉ូតូសណ្ដោងរ៉ឺម៉កមួយគ្រឿងកំពុងតែបើកបរលើដងផ្លូវសុខៗស្រាប់តែហៀរប្រេងចេញមកក្រៅបណ្តាលឲ្យបង្កជាអគ្គិភ័យឆាបឆេះយ៉ាងសន្ធោសន្ធៅត្រូវបានបងប្អូនប្រជាពលរដ្ឋជួយអន្តរាគមន៍បាញ់ពន្លត់ភ្លាមៗ។
ហេតុការណ៍នេះបង្កការភ្ញាក់ផ្អើលកាលពីវេលាម៉ោង៩ព្រឹកថ្ងៃទី២២ ខែកុម្ភៈឆ្នាំ ២០២៥ នៅតាមបណ្ដោយផ្លូវជាតិលេខ៤ ក្នុងសង្កាត់ចោមចៅទី៣ ខណ្ឌពោធិ៍សែនជ័យ ។
តាមប្រភពព័ត៌មានពីកន្លែងកើតហេតុបានឲ្យដឹងថានៅមុនពេលកើតហេតុគេបានឃើញបុរសម្នាក់បើកបរម៉ូតូសណ្តោងរ៉ឺម៉ក ធ្វើដំណើរតាមបណ្ដោយផ្លូវជាតិលេខ៤ ក្នុងទិសដៅពីលិចទៅកើតខណៈមកដល់ចំណុចកើតហេតុ ម៉ូតូសណ្ដោងរ៉ឺម៉កនោះក៏បានហៀរប្រេងចេញមកក្រៅ ធ្វេីឲ្យបានឆាបឆេះយ៉ាងសន្ធោសន្ធៅភ្លាមនោះបងប្អូនប្រជាពលរដ្ឋដែលនៅក្បែរនាំគ្នាជួយយកទឹកបានច្រោចពន្លត់តែមិនអាចគ្រប់គ្រងបានក៏យកបំពង់ពន្លត់អគ្គិភ័យមកបាញ់ពន្លត់ ទេីបអាចគ្រប់គ្រងបាន ។ ក្នុងហេតុការណ៍នោះផងដែរមិនបង្កឲ្យមាននរណាម្នាក់រងរបួសនោះទេ៕ដោយ៖សុខាសែនជ័យ
