គ្រូបង្វឹកក្រុមដំបូងរបស់ក្លិប Brentford លោក Justin Cochrane បានចូលរួមជាបុគ្គលិកក្នុងក្រុមជម្រើសជាតិអង់គ្លេសក្រោមការដឹកនាំរបស់លោក Thomas Tuchel។ បុរសអាយុ៤៣ឆ្នាំរូបនេះនឹងបន្តនៅក្នុងតួនាទីរបស់គាត់នៅ Brentford  រួមជាមួយនឹងការងារជាមួយក្រុមតោកំណាចអង់គ្លេស។

កីឡាករ Noni Madueke វ័យ២២ឆ្នាំ និង Lewis Hall និង Rico Lewis វ័យ២០ឆ្នាំ ដែលបច្ចុប្បន្នជាកីឡាករជម្រើសជាតិអង់គ្លេសទាំងអស់ក៏ធ្លាប់ត្រូវបានបង្វឹកដោយលោក Cochrane ដោយធ្លាប់លេងក្រោមគាត់អំឡុងពេលគាត់ជាអ្នកចាត់ការក្រុមជម្រើសជាតិអង់គ្លេសអាយុក្រោម១៥ឆ្នាំ ក្រោមអាយុ១៦ឆ្នាំ និងអាយុក្រោម១៧ឆ្នាំ។

លោក Cochrane បាននិយាយថា “នេះគឺជាឱកាសដ៏គួរឱ្យរំភើបសម្រាប់ខ្ញុំ ហើយខ្ញុំពិតជាមានអំណរគុណយ៉ាងខ្លាំងចំពោះ Brentford ដែលបានអនុញ្ញាតឱ្យខ្ញុំទទួលតួនាទីនេះ។ ភាគច្រើន ខ្ញុំទន្ទឹងរង់ចាំជួយក្រុមដែលមានទេពកោសល្យខ្លាំងនេះឱ្យសម្រេចបាន”។

អាជីពលេង១៣ឆ្នាំរបស់អតីតកីឡាករ Antigua និង Barbuda លោក Cochrane ក្នុងក្លិបបាល់ទាត់បានឡើងដល់កំពូលក្នុងការប្រកួត Championship ជាមួយក្រុម Crewe Alexandra ដែលគាត់បានបង្ហាញខ្លួន៧២ដងនៅចន្លោះឆ្នាំ២០០៣ និង២០០៦។

លោក Cochrane បានចាប់ផ្តើមអាជីពជាគ្រូបង្វឹករបស់គាត់ជាមួយក្លិប Tottenham មុនពេលចូលរួមជាមួយក្លិប Manchester United ក្នុងតួនាទីជាប្រធានផ្នែកអភិវឌ្ឍន៍កីឡាករ និងគ្រូបង្វឹកនៃសាលារបស់ក្លិប។

គាត់បានចូលរួមជាមួយ Brentford ក្នុងឆ្នាំ២០២២  មួយឆ្នាំបន្ទាប់ពីក្រុមនេះបានឡើងទៅលេងនៅ Premier League។ លោក Cochrane គឺជាការតែងតាំងចុងក្រោយសម្រាប់បុគ្គលិកផ្នែកខាងក្រោយក្រោមការដឹកនាំរបស់លោក Tuchel ដោយមានជំនួយការលោក Anthony Barry, គ្រូបង្វឹកអ្នកចាំទី Henrique Hilario និងគ្រូបង្វឹកលោក Nicolas Mayer ជាជំនួយការបន្ថែម។

ការប្រកួតដំបូងរបស់លោក Tuchel ក្នុងនាមជាគ្រូបង្វឹកជម្រើសជាតិអង់គ្លេសនឹងធ្វើឡើងនៅថ្ងៃទី២១ ខែមីនាខាងមុខ នៅពេលដែលក្រុមតោកំណាចអង់គ្លេសធ្វើជាម្ចាស់ផ្ទះទទួលក្រុមអាល់បានីនៅ Wembley ៕ (រូបភាព ៖ BBC)