ភ្នំពេញ៖ បុរស២នាក់បងប្អូនបង្កើតបានស្លាប់និងអ្នករួមដំណើរជាមួយគ្នាម្នាក់ទៀតរងរបួសធ្ងន់ក្នុងករណីគ្រោះថ្នាក់ចរាចរជិះម៉ូតូឆ្លងស្ពានព្រែកសំរោងក្នុងល្បឿនលឿនទៅបុករង្វង់មូលត្រើយខាងកើតពេញទំហឹងកាលពីវេលាម៉ោង១១និង២០នាទីយប់ថ្ងៃទី២១ ខែសីហា ឆ្នាំ២០១៦ គល់ស្ពានព្រែកសំរោងខាងកើត ភូមិកោះក្របី សង្កាត់ព្រែកថ្មី ខណ្ឌច្បារអំពៅ ។

ប្រភពព័ត៌មានពីសមត្ថកិច្ចឲ្យដឹងថា ជនរងគ្រោះទី១-ឈ្មោះ ប៊ុត ប៊ុនហេង ភេទប្រុស អាយុ៣៤ឆ្នាំ មុខរបរកសិករ ស្លាប់នៅកន្លែងកើតហេតុ ទី២-ឈ្មោះ ប៊ុត សុខលាភ ភេទប្រុស អាយុ២៣ឆ្នាំ មុខរបរលក់ត្រី ទាំងពីរនាក់បងប្អូនមានទីលំនៅភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ ស្លាប់នៅមន្ទីរពេទ្យ ។

ប្រភពបន្តថា នៅវេលាម៉ោងខាងលើគេឃើញបុរស០៣នាក់ជិះម៉ូតូម៉ាក Suzuki let ពណ៌ស គ្មានស្លាកលេខ ធ្វើដំណើរពីតាខ្មៅមកច្បារអំពៅដោយឆ្លងស្ពានព្រែកសំរោងក្នុងល្បឿនយ៉ាងលឿនមិនប្រយ័ត្នក៏ជ្រុលទៅបុកនឹងរង្វង់មូលគល់ស្ពានបណ្តាលឲ្យអ្នកអង្គុយខាងក្រោយស្លាប់ភ្លាមៗនៅកន្លែងកើតហេតុតែម្តង។ ចំនែកបុរស០២នាក់ទៀតត្រូវបានគេដឹកយកទៅសង្គ្រោះនៅមន្ទីរពេទ្យ ប៉ុន្តែពេលដល់មន្ទីរពេទ្យបានស្លាប់ម្នាក់ទៀត។

បច្ចុប្បន្នសពជនរងគ្រោះទាំងពីត្រូវបានគ្រួសារយកទៅធ្វើបុណ្យតាមប្រពៃណី ចំនែកម៉ូតូជនរងគ្រោះយកទៅរក្សាទុកនៅអធិការនគរបាលខណ្ឌច្បារអំពៅ៕

ដោយ៖ សណ្តោស