ខេត្តកំពង់ធំ ៖ ថ្ងៃអាទិត្យចុងទ្រព្យ! «កិច្ចសន្យាទំហំ៤០មុឺនដុល្លារ»មួយទៀត សម្រាប់ការផ្គត់ផ្គង់គ្រាប់ស្វាយចន្ទីសើមចំនួន៣០០តោន ត្រូវបានចុះហត្ថលេខាជាផ្លូវការ រវាងសហគមន៍កសិកម្មទំនើបស្វាយចន្ទីទាំង៣នៅខេត្តកំពង់ធំ និងក្រុមហ៊ុន Santana Agro Proucts។ នេះជាការលើកឡើងពី លោក ឃឹម ហ្វីណង់ អ្នកនាំពាក្យ និងជា អនរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី៣០ ខែមីនា ឆ្នាំ២០២៥។

លោក ឃឹម ហ្វីណង់ បញ្ជាក់ថា ៖ បូករួមនឹងកិច្ចសន្យាកាលពីដើមសប្តាហ៍ សហគមន៍កសិកម្មទំនើបស្វាយចន្ទីរបស់យើងបានលក់គ្រាប់ស្វាយចន្ទីបានសរុបជាង១លានដុល្លារ រួចជាស្រេចរហូតមកដល់ពេលនេះ ដែលធ្វើឱ្យយើងលែងព្រួយបារម្ភពីបញ្ហាទីផ្សារសម្រាប់រដូវកាលប្រមូលផលឆ្នាំនេះទៀតហើយ។ ចំណែកឯគ្រាប់ស្វាយចន្ទីដែលនៅសេសសល់នឹងត្រូវបានប្រមូលសម្ងួតទុក ដើម្បីលក់ស្ងួតនៅពេលក្រោយវិញម្តង។

លោក ឃឹម ហ្វីណង់ អ្នកនាំពាក្យ និងជា អនរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ សូមបញ្ជាក់ថា កិច្ចសន្យានេះធ្វើឡើងក្នុងលក្ខខណ្ឌតម្លៃប្រែប្រួលតាមជាក់ស្តែង ដោយក្រុមហ៊ុននឹងផ្តល់ជូន ១០០៛/គីឡូក្រាម បន្ថែមពីតម្លៃទីផ្សារនៅតាមតំបន់នីមួយៗ ហើយការចំណាយដឹកជញ្ជូនពីសហគមន៍គឺជាបន្ទុករបស់ក្រុមហ៊ុន។ ជាឧទាហរណ៍ជាក់ស្តែង ក្រុមហ៊ុនអាចផ្តល់ជូនដល់សហគមន៍ក្នុងថ្ងៃទី៣០ ខែមីនានេះ តម្លៃ៥៩០០៛/គីឡូក្រាម សម្រាប់គ្រាប់ស្វាយចន្ទីសើម ដែលមានកម្រិតភាគរយសាច់២៨% ៕

ដោយ ៖ សិលា