ភ្នំពេញ៖ ព្រះសង្ឃ២២អង្គ និងពលរដ្ឋប្រមាណ២០ នាក់ បាននាំគ្នាតវ៉ាទាមទារឲ្យសមត្ថកិច្ចដោះលែងព្រះសង្ឃខ្មែរក្រោម ២នាក់ដែលស្នាក់នៅវត្តអង្គតាមិញហើយត្រូវសមត្ថកិច្ចឃាត់ខ្លួនកាលពីព្រឹកថ្ងៃទី១ខែសីហាឆ្នាំ២០១៥កន្លងទៅនេះ បន្ទាប់ពីរកឃើញភាពមិនប្រក្រតីមួយចំនួនខុសនឹងវិន័យសង្ឃ ។
ការតវ៉ារបស់ព្រះសង្ឃនិងប្រជាពលរដ្ឋទាំងនោះបានប្រព្រឹត្តទៅកាលពីរសៀលថ្ងៃទី២ខែ សីហាឆ្នាំ២០១៥ នៅខាងមុខសាលាសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ដោយមានកាន់បដានិងសម្រែកសុំដោះលែងព្រះភិក្ខុពីរអង្គដែលបានចាប់ផ្សឹកដោយអះអាងថាព្រះ២អង្គដែលសមត្ថកិច្ចចាប់ផ្សឹកឃាត់ខ្លួននេះ ជាព្រះសង្ឃស្នេហាជាតិ ហើយការចោទប្រកាន់ របស់សមត្ថកិច្ច ជាការមួលបង្កាច់បង្ខូច ព្រះសង្ឃទាំងស្រុង។
ចំណែក សម្ភារ:ដែលរកឃើញ ក្នុងកុដិព្រះសង្ឃ សុទ្ធសឹងជាគម្រោង ផែនការរៀបចំដោយអាជ្ញាធរ នេះជារឿងអយុត្តិធម៌ សូមឲ្យសមត្ថកិច្ច ដោះលែង ព្រះសង្ឃ២មកខាងលើមកវិញ។ប៉ុន្តែការតវ៉ានេះមិនមានប្រសិទ្ធភាពឡើយ ដោយសារអាជ្ញាធរអះអាងថាជារឿងជាក់ស្តែងព្រោះក្រោយពេលចុះទៅឆែកឆេរនៅក្នុងកុដិលេខ៤នេះរកឃើញសម្ភារៈមួយចំនួនមិនគប្បីសម្រាប់ព្រះសង្ឃប្រើប្រាស់មែន គឺមិនមែនដូចការលើកឡើងរបស់ក្រុមអ្នកតវ៉ានិយាយនោះឡើយ។ទីបំផុតការទាមទារនេះមិនត្រូវបានអាជ្ញាធរដោះស្រាយឡើយ ទើបធ្វើឲ្យក្រុមអ្នកតវ៉ារំសាយនៅវេលាម៉ោង៤រសៀលថ្ងៃដដែល។
គួរបញ្ជាក់ថាកាលពីវេលាម៉ោង១១និង៣០នាទីព្រឹកថ្ងៃទី១ ខែសីហាឆ្នាំ២០១៥ កន្លងមកអាជ្ញាធរខណ្ឌពោធិ៍សែនជ័យក្រោមការដឹកនាំពីលោក ហែម ដារិទ្ធ អភិបាលខណ្ឌ និងមានការចូលរួម ពីលោក ថេ រ៉ាមី ក្រឡាបញ្ជី របស់ព្រះរាជអាជ្ញា អមសាលាដំបូងរាជធានីភ្នំពេញ បានចុះធ្វើរដ្ឋបាល នៅក្នុងវត្តអង្គតាមិញ ស្ថិតក្នុងភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ រហូតដល់ ធ្វើការឆែកឆេរ តាមកុដិ រកឃើញនៅកុដិលេខ៤ មាន ស្រោមអនាម័យ២ប្រអប់ អាវ មួក ថ្នាំញៀន១កញ្ចប់ បៀរមួយហ៊ូ ដាវ កាំបិត ស្រោមអនាម័យ ព្រមទាំងខោទ្រនាប់មនុស្សស្រីចំនួន៣ ដែលសុទ្ធសឹងជាវត្ថុដែលព្រះសង្ឃមិនត្រូវអនុញ្ញាតឲ្យប្រើ។
ការធ្វើរដ្ឋបាលខាងលើនេះអាជ្ញាធរបានឃាត់ព្រះសង្ឃចំនួន២អង្គ ទី១- ព្រះនាម ដាវ ទេព អាយុ ២៨ឆ្នាំនិង ទី២- ឈ្មោះ ជា វណ្ណាដា អាយុ៣០ឆ្នាំ ធ្វើការសាកសួរ និងនាំទៅកាន់វត្តជម្ពូវ័ន ដើម្បីរៀបចំពិធី ផ្សឹក ដែលមានការចូលរួមពី មន្ទីរធម្មការ ការិយាល័យធម្មការ អាជ្ញាធរ សមត្ថកិច្ច រួចប្រគល់ឲ្យទៅជំនាញ អធិការដ្ឋាននគរបាលខណ្ឌពោធិ៍សែនជ័យ ធ្វើការសាកសួរបន្តនិងកសាងសំណុំរឿង ចាត់ការទៅតាមនិតិវិធី ៕
ដោយ៖ ប្រាថ្នា
