ខេត្តបន្ទាយមានជ័យ: ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបញ្ជូនទៅសាលាដំបូងខេត្តហើយ នៅព្រឹកថ្ងៃសុក្រ ទី៤ ខែមេសា ឆ្នាំ២០២៥នេះ ដើម្បីអនុវត្តតាមនីតិវិធី។
នៅវេលាម៉ោង១៣និង០០នាទី ថ្ងៃទី០២ ខែមេសា ឆ្នាំ២០២៥ កម្លាំងជំនាញមូលដ្ឋានកងរាជអាវុធហត្ថស្រុកអូរជ្រៅ បានទទួលពាក្យបណ្តឹងរបស់ជនរងគ្រោះឈ្មោះ ទឹម ឃីម ភេទស្រី អាយុ៦៥ឆ្នាំ ជនជាតិខ្មែរ រស់នៅភូមិស្នួលទ្រេត ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានប្តឹងចោទប្រកាន់ទៅលើឈ្មោះ ខន វង់ ភេទប្រុស អាយុ៣៦ឆ្នាំ រស់នៅភូមិ-ឃុំជាមួយគ្នា ស្ដីពីករណីកំហែងយកប្រាក់ និងបានវ៉ៃបំផ្លាញសសរផ្ទះរបស់ជនរងគ្រោះ ប្រព្រឹត្តកាលពីវេលាម៉ោង២១ និង០០នាទីថ្ងៃទី០១ ខែមេសា ឆ្នាំ២០២៥ នៅចំណុចភូមិស្នួលទ្រេត ឃុំអូរបីជាន់ ស្រុកអូរជ្រៅ។ បន្ទាប់ពីទទួលពាក្យបណ្តឹង កម្លាំងជំនាញមូលដ្ឋានកងរាជអាវុធហត្ថស្រុកអូរជ្រៅ ដឹកនាំដោយលោកវរសេនីយ៍ឯក ហ៊ូ សារី មេបញ្ជាការមូលដ្ឋានកង រាជអាវុធហត្ថស្រុក បានចុះទៅដល់ទីតាំងកើតហេតុ និងបាននាំខ្លួនជនសង្ស័យឈ្មោះ ខន វង់ រួមនឹងវត្ថុតាងផ្លែរណាង៉ោង ប្រវែង៥៦សង់ទីម៉ែត្រ ចំនួន០១ដើម ហើយមកកាន់មូលដ្ឋានកងរាជអាវុធហត្ថស្រុក សួរនាំនិងចាត់ការតាមនីតិវិធី។
លោកអនុសេនីយ៍ឯក ហ៊ូ សារី មេបញ្ជាការមូលដ្ឋានកងរាជអាវុធហត្ថក្រុងបានឱ្យដឹងថា ក្រោយឃាត់ខ្លួន និងសួរនាំរួច ជនសង្ស័យបានឆ្លើយសារភាពថា ខ្លួនពិតជាបានកំហែងយកប្រាក់ពីជនរងគ្រោះ និងបានវ៉ៃបំផ្លាញសសរផ្ទះរបស់ជនរងគ្រោះពិតប្រាកដមែន។ ដោយផ្អែកលេីចម្លេីយសារភាព និងមានវត្ថុតាងជាក់ស្តែងកម្លាំងមូលដ្ឋានកងរាជអាវុធហត្ថស្រុកអូរជ្រៅ កសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថខេត្តចាត់ការបន្តតាមនីតិវិធី។ លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវនិងបង្ក្រាបបទល្មេីសបានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពី ឯកឧត្តម កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ។
ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបញ្ជូនទៅសាលាដំបូងខេត្ត ដើម្បីអនុវត្តតាមនីតិវិធី៕
ដោយ៖ វណ្ណា
