ខេត្តពោធិ៍សាត់៖ នៅព្រឹកថ្ងៃទី៨ ខែមេសា ឆ្នាំ២០២៥ ឧត្តមសេនីយ៍ទោ សេង ធារិន មេបញ្ជាការរង នាសេនាធិការ យោធភូមិភាគទី៥ បានអញ្ជើញចុះជួបសំណេះសំណាល និងសួរសុខទុក្ខកងទ័ពឈរជើងទប់ស្កាត់បទល្មើសព្រៃឈើនៅ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ នៅឃុំអូរសោម ស្រុកវាលវែង ខេត្តពោធិ៍សាត់។
ថ្លែងក្នុងពិធីសំណេះសំណាល ឧត្តមសេនីយ៍ទោ សេង ធារិន បានពាំនាំការផ្ដាំផ្ញើសួរសុខទុក្ខពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ព្រមទាំងថ្នាក់ដឹកនាំក្រសួងការពារជាតិ អគ្គបញ្ជាការ កងទ័ពជើងគោក និងយោធភូមិភាគទី៥ ផ្ញើជូននាយទាហាន នាយទាហានរង និងពលទាហាន ដែលបានលះបង់កម្លាំងកាយចិត្តក្នុងភារកិច្ចការពារបូរណភាពទឹកដី។
ឧត្តមសេនីយ៍ទោ បានជំរុញឱ្យថ្នាក់ដឹកនាំ នាយទាហាន នាយទាហានរង និងពលទាហាន បន្តយកចិត្តទុកដាក់ក្នុងកិច្ចការពារ ទប់ស្កាត់បទល្មើសព្រៃឈើឱ្យបានដាច់ខាត និងសេចក្តីថ្លៃថ្នូររបស់កងទ័ព។
ក្នុងឱកាសចុះជួបសំណេះសំណាល និងសួរសុខទុក្ខនេះ ឧត្តមសេនីយ៍ទោ សេង ធារិន ក៏បានពាំនាំអំណោយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត និងបណ្តាអង្គភាពចំណុះមានដូចជា គ្រឿងទេស, ភេសជ្ជៈ, ស្បៀងក្រៀម និងថវិកា មួយចំនួនផងដែរ៕
