ភ្នំពេញ ៖ កម្ពុជាក្នុងសម័យប្រជុំលើកទី៥៨ ក្រុមប្រឹក្សាសិទ្ធិមនុស្សអង្គការសហប្រជាជាតិ (HRC) របស់ខ្លួន បញ្ជាក់ពី សន្តិភាព ស្ថិរភាព និងការអភិវឌ្ឍចំណុចសំខាន់មួយចំនួនដែលដកស្រង់ចេញពីសេចក្តីថ្លែងការណ៍របស់កម្ពុជាក្នុងសម័យប្រជុំខាង លើរួមមាន៖

សន្តិភាព ស្ថិរភាព និងការអភិវឌ្ឍ៖ អស់រយៈពេលជាង ២៥ឆ្នាំកន្លងមក កម្ពុជាទទួល បានសន្តិភាព ស្ថិរភាព និងកំណើនសេដ្ឋកិច្ច ដែលសមិទ្ធផលនេះភាគច្រើនបានមកពី គោលនយោបាយឈ្នះ-ឈ្នះ របស់រាជរដ្ឋាភិបាល។ ស្របតាមការប្តេជ្ញាចិត្តចំពោះគោល ការណ៍ «ការមិនទុកនរណាម្នាក់ចោល» កម្ពុជាបានដាក់ចេញនូវក្របខ័ណ្ឌគោលនយោបាយ សំខាន់ៗ ដូចជាក្របខ័ណ្ឌគោលនយោបាយគាំពារសង្គមសម្រាប់ឆ្នាំ ២០១៦-២០២៥ មូលនិធិសមធម៌សុខាភិបាល និងគោលនយោបាយជាតិស្តីពីមនុស្សចាស់សម្រាប់ឆ្នាំ ២០១៧-២០៣០ ដើម្បីគាំទ្រប្រជាជនដែលងាយរងគ្រោះ និងលើកកម្ពស់ការអភិវឌ្ឍប្រកប ដោយបរិយាប័ន្ន។

ការពង្រឹងផ្នែកច្បាប់ និងស្ថាប័ន៖ កម្ពុជាបានខិតខំប្រឹងប្រែងឥតងាករេ ដើម្បីពង្រឹង ក្របខ័ណ្ឌច្បាប់ និងស្ថាប័នរបស់ខ្លួន ដើម្បីធានាថា បុគ្គលទាំងអស់ ជាពិសេសជនងាយរង គ្រោះបំផុត ទទួលបានសិទ្ធិ និងសេរីភាពពេញលេញ។ កម្ពុជាបានអនុវត្តវិធានការនានាក្នុង ការលើកកម្ពស់នីតិរដ្ឋ ជម្រុញការទទួលបានយុត្តិធម៌ និងរួមបញ្ចូលសិទ្ធិមនុស្សទៅក្នុង គោលនយោបាយជាតិ និងយុទ្ធសាស្ត្រអភិវឌ្ឍន៍។ កម្ពុជាក៏បានផ្តល់សារៈសំខាន់ស្មើគ្នាទៅ លើការលើកកម្ពស់សិទ្ធិក្នុងបរិបទសេដ្ឋកិច្ច សង្គម និងវប្បធម៌ ដោយទទួលស្គាល់ថាសិទ្ធ ទាំងនេះដើរតួនាទីចំបងក្នុងការរួមចំណែកឱ្យមានការអភិវឌ្ឍប្រកបដោយបរិយាប័ន្ន ក្នុងន័យ ធានាថាគ្មាននរណាម្នាក់ត្រូវបានទុកចោលឡើយ៕

ដោយ ៖ សិលា