ប្រសិនបើអាមេរិកពិតជាចង់ដោះស្រាយបញ្ហាពន្ធគយជាមួយចិន តាមរយៈការសន្ទនា និងការចរចានោះ ត្រូវតែបញ្ឈប់ការគំរាមកំហែងនិងធ្វើការសន្ទនាដោយឈរលើមូលដ្ឋានសមភាព ការគោរព និងផលប្រយោជន៍ទៅវិញទៅមក។

នៅថ្ងៃទី 23 ខែមេសា អ្នកនាំពាក្យក្រសួងការបរទេសចិន លោក Guo Jiakun បានបញ្ជាក់ថា ប្រទេសចិនមានគោលជំហរច្បាស់លាស់បំផុតចំពោះសង្គ្រាមពន្ធដារដែលផ្តួចផ្តើមដោយសហរដ្ឋអាមេរិក។ លោក Guo Jiakun បានធ្វើសេចក្តីថ្លែងការណ៍ខាងលើនៅក្នុងសន្និសីទសារព័ត៌មានជាទៀងទាត់បន្ទាប់ពីប្រធានាធិបតីអាមេរិក Donald Trump និងរដ្ឋមន្ត្រីក្រសួងរតនាគារ Scott Bessent បានធ្វើសេចក្តីថ្លែងការណ៍ចុងក្រោយអំពីភាពតានតឹងពាណិជ្ជកម្មរវាងប្រទេសទាំងពីរ។
មុននេះ នៅក្នុងសេចក្តីថ្លែងការណ៍មួយទៅកាន់អ្នកសារព័ត៌មានកាលពីថ្ងៃទី 22 ខែមេសា នៅការិយាល័យ Oval នៃសេតវិមាន លោកប្រធានាធិបតី Trump បាននិយាយថា ពន្ធដែលអាមេរិកដាក់លើទំនិញនាំចូលរបស់ចិននឹងត្រូវបានកាត់បន្ថយយ៉ាងខ្លាំងនៅពេលដែលភាគីទាំងពីរឈានដល់កិច្ចព្រមព្រៀង ប៉ុន្តែនឹងមិនកាត់បន្ថយមកត្រឹមសូន្យនោះទេ។
លោកប្រធានាធិបតី Trump ក៏បានកត់សម្គាល់ផងដែរថា សហរដ្ឋអាមេរិកនឹងទន់ជ្រាយចំពោះប្រទេសចិន ហើយរំពឹងថាដំណើរការនៃប្រទេសទាំងពីរឈានដល់កិច្ចព្រមព្រៀងមួយនឹងកើតឡើង “យ៉ាងឆាប់រហ័ស” ។
ដោយសំដៅលើពន្ធគយ 145% លើទំនិញចិន លោក Trump បានបញ្ជាក់យ៉ាងច្បាស់ថា ពន្ធចុងក្រោយ “នឹងមិនខ្ពស់នោះទេ”។
ទោះជាយ៉ាងណាក៏ដោយ ប្រសិនបើទីក្រុងប៉េកាំងមិនយល់ព្រមលើកិច្ចព្រមព្រៀងមួយ ទីក្រុងវ៉ាស៊ីនតោននឹងមានលក្ខខណ្ឌផ្ទាល់ខ្លួន។
នៅក្នុងសេចក្តីថ្លែងការណ៍មួយទៀត រដ្ឋមន្ត្រីក្រសួងហិរញ្ញវត្ថុ Bessent ក៏បាននិយាយផងដែរថា ភាពតានតឹងពាណិជ្ជកម្មរវាងសហរដ្ឋអាមេរិក និងចិននឹងមិនស្ថិតស្ថេរយូរទេ ហើយអាចនឹងធ្លាក់ចុះក្នុងពេលឆាប់ៗនេះ។
ថ្លែងនៅក្នុងព្រឹត្តិការណ៍មួយក្នុងទីក្រុងវ៉ាស៊ីនតោន លោក Bessent បានពណ៌នាអំពីពន្ធដ៏ធំដែលប្រទេសទាំងពីរដាក់លើគ្នាទៅវិញទៅមកថាជាសកម្មភាពសងសឹក។ បច្ចុប្បន្ននេះ ភាគីទាំងពីរមិនទាន់បានផ្តើមការចរចាជាផ្លូវការណាមួយលើបញ្ហាពន្ធដារនៅឡើយទេ៕ ដោយធីរីណា

រូបថត​: TTXVN