ភ្នំពេញ ៖ នារីម្នាក់ជិះម៉ូតូជ្រុលទៅបុករថយន្តសាំយ៉ុងដែលកំពុងឈប់ចតលើចញ្ចើមផ្លូវបណ្តាលឲ្យរងរបួសធ្ងន់ត្រូវបានបញ្ជូនទៅកាន់មន្ទីរពេទ្យ ដើម្បីធ្វើការសង្រ្គោះភ្លាមៗ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងនៅវរលាម៉ោង៧និង០០នាទីព្រឹក ថ្ងៃទី២៤ ខែមេសា ឆ្នាំ២០២៥ ស្ថិតនៅមុខវត្តស្ទឹងមានជ័យ តាមបណ្តោយផ្លូវ២១៧ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញនារីរងគ្រោះខាងលើជិះម៉ូតូមួយគ្រឿងម៉ាកស្គុបពីពណ៌ក្រហម ពាក់ផ្លាកលេខ កណ្តាល1Z-4485 ធ្វើដំណើរចេញពីផ្ទះចេញទៅការរោងចក្រនៅម្តុំផ្លូវវេងស្រេងកាណាឌីយ៉ា ក្នុងទិសដៅពីកើត ទៅលិចក្នុងល្បឿនលឿន បានជ្រុលទៅបុករថយន្តសាំយ៉ុងមួយគ្រឿងដែលកំពុងឈប់ចតនៅលើចញ្ចើមផ្លូវបណ្តាលឲ្យរងរបួស ធ្ងន់ត្រូវបានបញ្ជូនទៅកាន់មន្ទីរពេទ្យមិត្តភាពខ្មែរ សូវៀត. ។
ក្រោយពេលកើតហេតុសមត្ថកិច្ចបានចុះមកយកម៉ូតូជនរងគ្រោះទៅរក្សាទុកនៅប៉ុស្តិ៍នគរបាលរដ្ឋបាលសង្កាត់ស្ទឹងមានជ័យទី១ ដើម្បីប្រគល់ជូនជនរងគ្រោះវិញនៅពេលក្រោយ៕
ដោយ ៖ ភារ៉ា ដង្កោ
