ប្រទេសចិន៖ យោងតាមគេហទំព័រ «CCFR China state-controlled media » បានចុះផ្សាយថា នៅព្រឹកថ្ងៃទី២៤ ខែមេសា ឆ្នាំ២០២៥នេះ ការិយាល័យព័ត៌មាននៃក្រុមប្រឹក្សាកិច្ចការរដ្ឋចិនបានបើកធ្វើសន្និសីទកាសែតដើម្បីធ្វើបទឧទ្ទេសនាមពីសភាពការណ៍កសាងកម្មសិទ្ធិបញ្ញារបស់ចិន។
CCFR បាននិយាយទៀតថា ក្នុងឆ្នាំ២០២៤ ការងារកម្មសិទ្ធិបញ្ញារបស់ប្រទេសចិនសម្រេចបានគុណភាពកាន់តែល្អ។ ពេញមួយឆ្នាំ ចិនបានផ្តល់ប៉ាតង់ចំនួន ១ លាន ៤ ម៉ឺន ៥ ពាន់ប៉ាតង់។ ខណៈចំនួនស្នើសុំប៉ាតង់អន្តរជាតិតាមស្តង់ដា « កិច្ចព្រមព្រៀងសហប្រតិបត្តិការប៉ាតង់ (PCT) » របស់ប្រទេសចិនគឺឈរនៅលំដាប់ទីមួយលើពិភពលោក។
យោងតាម «របាយការណ៍ស្តីពីសន្ទស្សន៍ច្នៃប្រឌិតពិភពលោកឆ្នាំ ២០២៤» ដែលប្រកាសដោយអង្គការកម្មសិទ្ធិបញ្ញាពិភពលោកឱ្យដឹងថា ប្រទេសចិនឈរនៅលំដាប់ទី ១១ , ក្រៅពីនេះ ក្នុងចំណោមចង្កោមបច្ចេកវិទ្យាកំពូលចំនួន ១០០ លើពិភពលោក មានចំនួន ២៦ ស្ថិតក្នុងប្រទេសចិន៕
ដោយ៖តារា
